जेठ १८ बन्दया सफलताया समीक्षा
यें (सन्ध्या टाइम्स) / नेवाः जागरण मंचं वंगु जेठ १८ गते जूगु नेपाल बन्द ज्याझ्वः बारे मुँज्या यानाः समीक्षा बैठक यात । क्षेत्रपाटी पार्टी पालेसय् जूगु भेलाय् नेवाः जागरण मंच तदर्थ समितिया दुजःपिं लिसें जागरण मंचया कवः ब्यापारी मंच विद्यार्थी मंच संकिपा मंच सुरक्षा मंच लिसें वडा कचाया पदाधिकारीपिं मुंगु खः । मुँज्याय् मंचया केन्द्रीय संयोजक सुजीव बज्राचार्यं जेठ १८ गतेया बन्दय् ब्वति काःपिं सकसितं सुभाय् देछासें बन्दय् ब्वति काःपिं धात्थेंया नेवाः कार्यकर्ता जूगु धारणा न्ह्यब्वयादिल ।
केन्द्रीय छ्यांजे विजयकृष्ण श्रेष्ठं जातीय सवालय् नेवाःतय् दथुइ छुं नं कथंया विभाजन जुइ मजिउ धइगु मान्यतां यानाः हे वंगु जेठ १८ गतेया बन्द ताःलाःगु बिचाः प्वंकादिल । बैठकय् सहभागी जुयादीपिं मंचया पदाधिकारीपिंसं नेवाःतय् निंतिं नियमित रुपं हे संघर्षया ज्याझ्वः घोषणा यायेमाःगु बिचाः प्वंकादिल । बैठकय् मंचया थीथी कवः व कचाया गतिविधि नं न्ह्यब्वयेगु ज्या जूगु खः ।
