भरतमोहन हःगुलिं साहना रुष्ट
यें (सन्ध्या टाइम्स) / अध्यक्ष झलनाथ खनालं स्थायी समितिइ भरतमोहन अधिकारी छम्हेसित नं नियुक्त यायेसातकि वय्कःया विपक्षी गुट केपी ओली समर्थित केन्द्रीय दुजःत ला तम्वःगु हे जुल उकिया नापनापं वय्कःया थःगु हे गुट दुने नं असन्तुष्टि पिहां वःगु दु ।
सूत्रतय्सं बिउगु जानकारी कथं भरतमोहन अधिकारीयात स्थायी समितिया दुजः दयेकल धकाः पार्टीया मेम्ह वरिष्ठ नेता साहना प्रधान तम्वःगु दु । मय्जु प्रधान न्हापा पार्टीया स्थायी समिति दुजः जुया-च्वंगु खःसां वंगु महाधिवेशनय् बुइवं केन्द्रीय दुजलय् सीमित जूवंगु खः ।
म्हिगः च्वंगु पार्टीया केन्द्रीय बैठकय् अध्यक्ष खनालं आकाझाकां हे भरतमोहनया नां प्रस्तावित यायेवं ओली गुटया दुजःतय्सं विरोध याःगु खः । लिसें म्हिगःया बैठकय् खड्ग ओली नं भारत वनेमाःगुलिं उपस्थित मजू । ओली मदुगु पाः लाकाः खनालं थःगु पक्षयाम्ह छम्ह मनूयात स्थायी समितिइ थपे याये हःगुलिं ओली गुटं प्रक्रिया मिले मजुल धकाः विरोध याःगु खः ।
अधिकारी छम्ह नं वःगुलिं स्थायी समितिइ खनाल पक्ष अझ क्वातुगु दु ।
