पत्रकारतय् सुरक्षा जुइ
यें (सन्ध्या टाइम्स) / पत्रकारतय्त आक्रमण याइपिं न्ह्याम्ह हे जूसां नं वयात कारवाही यायेगु खँ प्रधानमन्त्री माधव नेपालं धयादीगु दु । थौं सुथय् पत्रकारतय् सुरक्षाया ग्यारेन्टी जुइमाःगु माग यासें थःत ज्ञापनपत्र लःल्हायेत वःपिं पत्रकारतलिसे खँ ल्हायेगु झ्वलय् वय्कलं उगु खँ धयादीगु खः ।
होटेल मल्लया क्यासिनो कर्मचारीतपाखें पत्रकारतय्त जूगु आक्रमणयात कयाः थौं हे सुरक्षाया अधिकृततय्त सःताः छानवीन यायेगु आश्वासन बियादिसें वय्कलं संविधान दयेकेगु व शान्ति प्रकि्रयायात निष्कर्षय् थ्यंकेगु निंतिं पत्रकारतय्सं भूमिका म्हितेमाःगु खँ नं कनादीगु दु ।
थौं सुथय् रिपोर्टस्र क्लबया नेतृत्वय् घौछि प्रधानमन्त्री ज्याकुथी धर्ना बीगुया लिसें प्रमयात ज्ञापनपत्र लःल्हाःगु खः ।
