कांग्रेस मन्त्रीतय् नां प्रधानमन्त्री थाय्
सरकारय् वनिपिं कांग्रेसया मन्त्रीत व मन्त्रालयया बारे अन्तिम निर्णय जुइवं थुगु नां ढल प्रधानमन्त्री माधवकुमार नेपालया थाय् छ्वःगु दु ।
मन्त्रीतय् नां व कार्यविभाजन याये न्ह्यः कांग्रेस सभापति गिरिजाप्रसाद कोइरालां कांग्रेसया शीर्ष नेतानाप सहलह यानाः थ्व निर्णय याःगु दु । निर्णय कथं नेता प्रकाशसरण महतया उर्जा, बालकृष्ण खाँडयात जलस्रोत, पूर्णकुमार शेर्मायात स्थानीय विकास, मोहमद आफताब आलमयात श्रम तथा यातायात, मिनेन्द्र रिजालयात संघीय मामिला, संविधानसभा व्यवस्था व संसदीय व्यवस्था व उमाकान्त चौधरीयात स्वास्थ्य मन्त्रालयया जिम्मेवारी बीगु निर्णय याःगु दु । थ्व स्वयां न्ह्यः कांग्रेस नेतृ सुजता कोइरालायात परराष्ट्र मन्त्रालयया जिम्मेवारी बीधुंकूगु दु ।
अथेहे कांग्रेसं गणेशबहादुर खड्कायात स्थानीय विकास, चन्द्रिसंह भट्टराईयात ऊर्जा व खड्गबहादुर बस्यालयात स्वास्थ्य राज्यमन्त्रीया जिम्मेवारी बीगू निर्णया याःगु दु ।
एमालें नं थःगु पार्टी पाखें सरकारय् वनीगु मन्त्रीतय् कार्यविभाजन यायेधुंकूगु दु । कार्यविभाजन कथं भीम रावलयात गृह, शंकर पोखरेलयात सूचना व संचार, रकम चेम्जोङयात सामान्य प्रशासन व रवीन्द्र श्रेष्ठयात शान्ति मन्त्रालयया जिम्मेवारी बीगू जूगु दु ।
एमाले व कांग्रेसया नेतात दथुइ मन्त्रालयया कार्यविभाजन सिधःगुलिं थौं हे प्रधानमन्त्री नेपालं कांग्रेस व एमाले नेतातय्त सपथ ग्रहण याकीगु ज्याझ्वः दु ।
