मधेशी मोर्चा पाखें मन्त्रालय भागबन्डा प्रति असहमति
सत्ताया नेतृत्व यानाच्वंगु नेकपा (एमाले) व सत्ता साझेदार नेपाली कांग्रेस दथुइ म्हिग जूगु मन्त्रालय भागबन्डा प्रति संयुक्त लोकतान्त्रिक मधेशी मोर्चां असहमति प्वंकूगु दु ।
आईतवाः मधेशी मोर्चाय् दुथ्याःगु स्वंगुलिं दलया बैठकं एमाले व कांग्रेसं मन्त्रालय भागबन्डा यायेगु ईलय् थःपिं नाप सहलह मयाःगु धासें असहमति प्वंकूगु खः । मार्चां सरकार गठन यायेगुलि थःपिनिगु नं तःधंगु ल्हा दुगु धासें मान्त्रालय भागबन्डा थःपिं नाप सहलह यानाः जक यायेमाःगु माग याःगु दु ।
थौं तराई-मधेश लोकतान्त्रिक पार्टीया संसदीय दलया ज्याकूथी जूगु मधेशी जनअधिकार फोरम गच्छदार पक्ष, तराई-मधेश लोकतान्त्रिक पार्टी व सद्भावना पार्टी दथुइ जूगु बैठकं एमाले व कांग्रेसं थःपिंसं दक्वं प्रभावशालि मन्त्रालय ल्ययाः ल्यं दुगु मन्त्रालय मधेशवादी पार्टीतय्त ब्यूगु धासें अज्याःगु मन्त्रालय मार्चां मकायेगु निर्णय याःगु दु । अथेहे मार्चां थौं बिस्तार जुइगु मन्त्रिमण्डलय् नं ब्वति मकायेगु निर्णय याःगु दु ।
थ्व स्वयां न्ह्यः फोरम गच्छदार पक्षं गृह सहित न्याःगु मन्त्रालय व प्यंगु राज्यमन्त्री फोरमयात बीमा:गु माग यानावयाच्वंगु खः ।
