कांग्रेस-एमालें जक याःगु निर्णय अमान्य : गच्छदार
मधेशी जनअधिकार फोरमया नेता विजयकुमार गच्छदार पक्षं मन्त्रालय भागबन्डा यायेगु ईलय् कांग्रेस व एमालें थःगु पार्टी नाप सहलह मयाःगुलिं असन्तुस्ति प्वंकूगु दु ।
शनिवाः थःगु पक्षया केन्द्रीय दुजः व सभासदतय् मंकाः बैठक लिपाः याःगु पत्रकार सम्मेलनय् फोरम संसदीय दलया नेता गच्छदारं कांग्रेस व एमालें मन्त्रालय भागबन्डा यायेगु ईलय् फोरमयात मसःतुगु धासें कांग्रेस व एमालें भागबन्डा याःगु मन्त्रालय थःगु पार्टीयात अमान्य जुइगु धयादिल । वयेकलं भागबन्डा यायेवलय् थःगु पार्टी नाप सहलह यानाः जक क्वछीमाःगु धयादिल ।
अथेहे नेता गच्छदारं गृहमन्त्रालय नापं मेमेगू शक्तिशाली मन्त्रालय मधेशवादी दलतय्त बीमाःगु माग यानादिल । वयेकलं थ्व सरकार गठनय् मधेशवादी दलतय् तःधंगू ल्हाः दुगु धासें गृह, जलस्रोत, शिक्षा वा स्वास्थ्य व संचार वा स्थानीय विकास मन्त्रालय मधेशवादी दलतय्त देयेमाःगु दाबी यानादिल ।
थ्वस्वयां न्ह्यः गच्छदार पक्षया नीगुम्ह सभासद व झिंखुम्ह केन्द्रीय दुजःतय्गु मंकाः बैठकं सरकारय् दुथ्याःगु दलतय्सं हस्ताक्षर याःगु सरकारया मंकाः न्यूनतम ज्याझ्व स्वलाःया दुने कार्यान्वया याकेत सरकार दुने व पिने च्वनाः दबाब बीगु निर्णय याःगु दु । अथेहे बैठकं समावेशी विधेयक व फागुन १६ गते सरकार व मधेशी मोर्चा दथुइ जूगु सम्झौता कार्यान्वयन याकेगु निर्णय याःगु दु । नापं मधेश आन्दोलनया सहिद छेँजःया छम्हेसित सरकारं रोजगारी बिमाःगु माग याःगु दु ।
