निन्हुया दुने मन्त्रिमण्डल पूर्णता : खनाल

सत्ताया नेतृत्व यानाच्वंगु नेकपा (एमाले)या अध्यक्ष झलनाथ खनालं निन्हुया दुने मन्त्रिमण्डलं पूर्णता काइगु दाबी यानादीगु दु ।

एमाले निकट प्रजातान्त्रिक राष्ट्रिय युवा संघ मोरङया खुक्वःगु नगर सम्मेलनया उल्लेज्या यायेगु झ्वलय् वयेकलं निन्हुया दुने सरकारं पूर्णता काइगु धासें एमालें थप खुगू मन्त्रीया नां प्रधानमन्त्री माधवकुमार नेपालयात शुक्रवाः हे बीधुनाःगु खँ धयादीगु दु । वयेकलं अर्थ, गृह व संचार स्वंगुलिं मन्त्रालय एमालें हे तयादीगु नं धयादिल ।

एमाले अध्यक्ष खनालं सहमति बिनाः न्ह्या वने मफइगु धासें माओवादीयात नं सहमतिइ हेमाःगु धयादिल । वयेकलं सहमतिया निंतिं एमालें पहल न्ह्याकेधुंकूगु जानकारी बियादिसें सरकार पिने च्वनाच्वंगु दलतय् नं सहमतिइ दुने वइगु विश्वास प्वंकादिल ।