पत्रकारतय्त सःताः दाःगु घटनाया त:च्वकं विरोध
थीथी पत्रकार व मानव अधिकारकर्मीतय्सं होटेल मल्लय् व्यवस्थापन पक्षं अमानवीय ढंगं पत्रकारतय्त सःताः दाःगु घटनाया विरोध यासें उकिया छानबिन व दोषीयात कार्वाहीया माग याःगु दु ।
जनसंचार अभियानय् याःगु ज्याझ्वलय् न्वंवासें पत्रकार वा मानव अधिकारकर्मीतय्सं पत्रकारतय्त दाःगु छगू घटना जक मजूसें प्रेस जगत दथुइ हे हमला जूगु धासें दोषीयात कारबाहीया माग याःगु दु ।
राष्ट्रिय मानवअधिकार सरोकार केन्द्रया नायः मुक्ति प्रधानं पत्रकारया सुरक्षा जनतां जक यायेफइगु धासें जनताया पक्षय् कलम न्ह्याकेत साचारकर्मीतय्त इनाप यानादीगु खः । क्रान्तिकारी पत्रकार संघया ओम शर्मां पत्रकारयात या:गु हमलाया विरोध यासें सरकारं प्रेसया सुरक्षा बिइमफुगु धयादीगु दु । पत्रकारतय्त दाःसां तकं उकिया विरोधय् छु नं विषेश ज्याझ्वः मजूगुलि दुःख प्वंकूसें वयेकलं आन्दोलनया छु नं ज्याझ्वलय् क्रान्तिकारी पत्रकार संघया ऐक्यबद्धता दुगु धयादीगु दु ।
पत्रकार महासंघया दांभरि रमेश विष्टं पत्रकारतय्गु निंतिं राज्य हे मदुगु धासें प्रहरी महानिरीक्षकयात नापलानाः आक्रमणकारीतय्त मालेत इनाप याःसां नं महानिरीक्षकं ई मब्यूगु खँय् दुःख तायेकादीगु दु । अथेहे प्रेस युनियनया नायः शमीर जंग शाह, प्रेस चौतारीया गणेश बस्नेत व पत्रकार केदार कोइरालां घटनाप्रति पत्रकारतय्गु छाता संगठन पत्रकार महासंघ मौन च्वंगुलिं आलोचना याःगु दु ।
ज्याझ्वलय् न्ववापिसं होटेल मल्लया व्यवस्थापन पक्षं एभिन्युज टेलिभिजन पत्रकार डिल्लीराज पोख्रेलयात समाचार सम्प्रेषण यायेत सःताः खापा तिनाः दा:गु खसाः क्यासीनो दुने हे आक्रमणकारीत दुसां नं प्रहरीं उमित मज्वंगु खँय् च्यूताः प्वंकूगु ख: ।
