गां व कीपु नगरपालिकाय् छगू हे इलय् विरोधसभा
राष्ट्रपतिया असंवैधानिक पला: लितः कायेमा:गु व नागरिक सर्वोच्चता माग यासें एकीकृत नेकपा (माओवादीं) शनिवाः येँ जिल्लाया न्ययेन्हय्गू गां व कीपु नगरपालिकाय् छगू हे इलय् विरोधसभा याःगु दु ।
जनसाचार अभियान नेपालय् थौं पत्रकार सम्मेलन यानाः एकीकृत नेकपा (माओवादी) येँ जिल्ला संगठन समितिं शनिवाः बहनि न्याताः इलय् मशाल जुलुससहित याइगु व लिपा जुइगु विरोधसभाय् माओवादी पोलिट्ब्यूरो दुजःनिसें नेवाः राज्य समिति दुजःतय्सं सम्बोधन यायेगु ज्याझ्वः दुगु जानकारी ब्यूगु दु । पत्रकार सम्मेलनय् माओवादी केन्द्रीय दुजःत व येँ जिल्ला इन्चार्ज पवनमान श्रेष्ठं देय्या सदरमुकाम व शहरय् जक केन्द्रीत संघर्षया ज्याझ्वलय् गां गामय् वनाः जनतातय्त ब्वति कायेकेगु उद्देश्यं विरोध सभा यायेत्यना:गु जानकारी बियादिल । वय्कलं जननिर्वाचित सरकारयाविरुद्ध राष्ट्रपितं असंवैधानिक 'कु' यानाः सेनापतियात थमौति याःगु व नागरिक सर्वोचताया उपहास याःगु धयादीगु खः । नेता श्रेष्ठं प्रतिगमन मिभंकूगुलिं विदेशी अतिक्रमण अप्वःगु धासें थुकिं देय्यात भयानक दुर्घटनाय् यंकीगु शंका नं प्वंकादिल ।
विरोधसभा अन्तर्गत जितपुरफेदीइ पोलिट्ब्यूरो दुजः हिसिला यमी, गोठाटारय् केन्द्रीय दुजः झक्कु प्रसाद सुवेदी, गोगंबुइ केन्द्रीय दुजः तथा नेवाः राज्य समितिया छ्यांजे दिलिपकुमार प्रजापति, कपनय् केन्द्रीय दुजः पवनमान श्रेष्ठ, थानकोटया महादेवस्थानय् केन्द्रीय दुजः सर्वोत्तम डंगोल, कीपुया पांगाय् केन्द्रीय सल्लाहकार दिलिप महर्जन व बुढानिलकण्ठय् केन्द्रीय सल्लाहकार तिलक परियारं सम्बोधन याइगु जूगु दु ।
