येँ व कलैयाय् वाइसिएलया मोटरसाइकल र्याली
राष्ट्रपतिया असंवैधानिक पला: लितः कायेमाःगु व नागरिक सर्वोच्चता पलिस्थाया माग यासें थौं वाईसीएल नेपालं येँय् विशाल मोटरसाइकल र्याली पिकाःगु दु । न्हिनय् स्वताः इलय् खुल्लामाचपाखें न्ह्याःगु र्यालीं चक्रपथ चाःहिलाः न्हूगु बानेश्वर थ्यंकाः सभाय् हिउगु खः । कोणसभाय् माओवादी नेता जनार्दन शर्मा 'प्रभाकर', वाइसिएल नायः गणेशमान पुन लगायतं सम्वोधन यानादीगु खः ।
अथेहे राष्ट्रियता रक्षाया निंतिं धासें वाइसीएल भोजपुरा राज्य समितिं नं थौं बाराया कलैयापाखें मोटर साइकल र्यालीया ग्वसाः ग्वःगु दु । कलैयापाखें न्ह्याःगु मोटरसाइकल र्याली मटिअर्वा दक्षिण झिस्कैया व वीरगाज जुयाः बाराया सिमराय् थ्यंकाः कोणसभाय् हिउगु खः ।
अथेहे राष्ट्रपतिया असंवैधानिक पला: लितः कायेगु व संकल्प प्रस्तावदथुइ सदनय् सहलह जुइमाःगु मागलिसे थौं स्वास्थ्यकर्मीतय्सं सतकय् वासः यानाः विरोध प्रदशर्न याःगु दु । नागरिक सर्वोच्चताया निंतिं माओवादीं घोषणा याःगु संघर्षया ज्याझवलय् ऐक्यबद्धता क्यंसें अखिल नेपाल जनस्वास्थ्यकर्मी संघं न्हूसतकया वंगलः सीमा व यलया कुपण्डोलय् सतकय् च्वनाः वासः याःगु जानकारी ब्यूगु दुसा थुखे माओवादी आन्दोलनयात समर्थन यासें राष्टिय उद्योग व्यापार महासंघं नं सुथय् झिताः इलंनिसें छघौ स्वनिगलय् चक्काजाम व स्वनिगलंपिने झिंछताः इलंनिसें छघौतक चक्काजाम याःगु दु ।
