सरकार बिस्तारय् लिवाना च्वंगु खँय् च्यूताः
अमेरिकां मुख्य राजनीतिक दल व एकीकृत नेकपा (माओवादी) दथुइ अप्वःगु दूरीया कारण शान्ति प्रकृयाय् खनेदुगु अन्यौल व सरकार बिस्तारय् लिवना च्वंगु खँय् च्यूताः प्वंकादीगु दु ।
राष्ट्रपति डा. रामवरण यादव व प्रधानमन्त्री माधवकुमार नेपाललिसे व्यागलं नापलागु झ्वलय् मध्य तथा दक्षिण एसिया मामिला सम्बन्धी नवनियुक्त अमेरिकी सहायक बिदेश मन्त्री रोबर्ट ओरसी ब्लेकं उगु च्यूताः प्वंकादीगु खः ।
सिंहदरवारय् प्रधानमन्त्री नेपाललिसे जूगु छघौया नापलाय् ज्याय् ब्लेकं नेपाःया शान्ति प्रकृया सफलताय् थ्यंगु अमेरिकां स्वये चाहे जूगु खँ प्रधानमन्त्रीया विदेश मामिला सल्लाहकार राजन भट्टराईं जानकारी ब्यूगु दु । विदेश मामिला सल्लाहकार भट्टराईयाकथं ब्लेकं न्हूगु सरकारया प्राथमिकता संविधान निर्माण, सेना समायोजन, शीविरय् दुपिं मस्त व अनमिनया समायावधि लगायतया विषयस च्यूताः तयादीगु खः । ब्लेकं माओवादी लिसेया राष्ट्रिय सहमतिया सरकार दयेकेत प्रधानमन्त्रीयात सुझाव बियादीगु खसा: लिसलय् प्रधानमन्त्री नेपालं सरकार बिस्तार यायेगु ज्या पूवनेवं हे माओवादीलिसे नं समझदारी यानाः शान्ति प्रकृयायात निरन्तरता बिइगु जानकारी बियादीगु खः ।
अथेहे खंल्हाबंलाया झवलय् नेपाली राजदुतयात अमेरिका वनेगु निंतिं कोटा बिइगुबारे नं सहलह जूगु खः । ब्लेकं थुकीया बारे कन्हय् पत्रकार सम्मेलन यानाः विस्तृत जानकारी बीगु खँ धयादीगु दु ।
ब्लेकं थौं हे राष्ट्रपति डा. रामवरण यादवयात राष्ट्रपतिया ज्याकू शीतल निवासय् नापलानादीगु खः । राष्ट्रपति नाप नापलाय्गु झ्वलय् निगू देय् दथुइया स्वापू, आर्थिक ग्वाहालि लगायतया विषयसं सहलह जूगु खः ।
