एमाले दुने कार्य विभाजन क्वःजित
स्वन्हु न्ह्यःनिसें न्ह्या:गु नेकपा (एमाले) केन्द्रीय समितिया बैठकय् दुजःतय्गु कार्य विभाजनबारे थौं नं सहलह न्ह्याःगु दु । मू छ्याँजे ईश्वर पोखरेलं बैठकय् न्ह्यब्वःगु झिंच्यागू विभागया प्रमुख तथा अाचल कजिया नां धलःबारे सहलह जूगु दु ।
पार्टी ज्याकु बल्खुइ न्हिनय् न्ह्याःगु बैठकं थौं औपचारीक रुपं केन्द्रीय दुजःतय्गु कार्य विभाजन क्वःछ्यूगु दु । स्कूलिङ विभाग प्रमुखय् झलनाथ खनाल, संगठन विभागय् अशोक राई, प्रचार विभागय् ईश्वर पोखरेल, विदेश विभागय् केपी ओली, अर्थ विभागय् भरतमोहन अधिकारी, सहकारी विभागय् केशव बडाल, राज्यव्यवस्था विभागय् राजेन्द्र पाण्डे, स्थानीय विकास तथा भौतिक संरचना विभागय् गोकर्ण विष्ट, शैक्षिक विभागय् महेन्द्र पाण्डे, सामाजिक सेवा विभागय् उर्मिला अर्याल व राज्य पूनस्ररचना विभागय् प्रमुखयारुपं रकम चेमजोङया नां प्रस्ताव याःगु दु । पार्टी दुने तसकं महत्व तइगु संगठन विभाग व प्रशिक्षण विभागया निंतिं झलनाथ खनाल पक्ष व केपी ओली पक्षदथुइ विवाद खनेदुगु दु । खनाल पक्षं पार्टी स्कुलिङ विभागया प्रमुखय् वामदेव गौतमयात व संगठन विभागया प्रमुखय् अशोक राईयात प्रस्ताव याःसां नं ओली पक्षं खनालया प्रस्तावयात अस्वीकार याःगु खः । पार्टी स्कुलिङ विभागया नेतृत्व थःत दयेमाःगु अडान कया म्हिगः न्हिच्छि विवाद याःसां नं लिपा ओली विदेश विभाग प्रमुखय् च्वनेत सहमत जूगु एमाले स्रोतं जानकारी ब्यूगु दु ।
नेतातय्गु शैक्षिक योग्यता व पार्टीप्रतिया योगदानयात मूल्यांकन यानाः उगु नांत हिलाबुला यायेमाःगु बैठकय् सः पिदनाच्वंगु दु । आन्तरिक गुटबन्दीया कारण एमालें सरकारय् छ्वयेगु थःहे मन्त्रीतय्गु नां नापं ल्ययेफुगु मदुनि ।
