सरकार अलमलय्
मन्त्रालय भागबन्डाय् सहमति मजुयाः माधव नेपाल नेतृत्वया गठबन्धन सरकार अलमलय् लाःगु दु । पार्टी तछ्यानाः जूसां नं माधव नेपाल गठबन्धन सरकारयात ग्वाहालि यायेत वंम्ह विवादित उपप्रधानमन्त्री विजय कुमार गच्छादारं वर्तमान सरकारय् थप प्यम्ह मन्त्री व न्यागू राज्य मन्त्रीया दावी यानादीगु दु ।
थौं सुथय् प्रधानमन्त्री निवास बालुवाटारय् प्रधानमन्त्री माधव कुमार नेपाललिसेया नापलायेज्याय् वय्कलं थः मन्त्रालय भागबन्डाबारे पुलांगु हे अडानय् कायम दुगु धयादीगु खः । प्रधानमन्त्री जूगु स्ववाः दयेधुंकूसां नं मन्त्रीमण्डलं पूर्णता मकायेवं थौं प्रधानमन्त्री नेपालं मन्त्रीमण्डल भागबन्डाबारे सहलह न्ह्यःने न्ह्याकूगु खः । पार्टी दुनेया विवाद, माओवादीया असहयोग व कांग्रेसया निर्देशनय् च्वनेत बाध्य प्रधानमन्त्री नेपाललिसे नापलानाः उपप्रधानमन्त्री गच्छेदारं माग कथंया मन्त्री मदुसा सरकार समस्याय् लाइगु ख्याच्वः समेत बियादीगु गच्छेदार पुचलं जानकारी ब्यूगु दु । मन्त्रीमण्डलं पूर्णता मदयाः आः नं नेपाली कांग्रेसपाखें सरकारय् ब्वति दुपिं न्याम्ह व मालेपाखें सरकारय् ब्वति दुम्ह छम्ह मन्त्री विना विभागीय मन्त्रीयारुपं च्वनेत बाध्य जूगु दु ।
