मुनासः ख्यालः कासाय् “कय्ता तंम्ह नेवाः” न्हाप

म्हिगः मंगलवाःनिसें निन्हुयंक न्ह्याःगु स्वनिगः ब्यापि मुनासः ख्यालः धें धें बल्ला कासा–११४६य् “कय्ता तंम्ह नेवाः” ख्यालः न्हाप लाःगु दु ।

थुगु ख्यालः थौं लियांल्यू न्ह्यब्वःगु खः । नेपालभाषा सिनेमा विकास केन्द्रं न्ह्यब्वःगु थुगु ख्यालकं न्हाप सिरपालिसें उत्कृष्ट च्वमि व उत्कृष्ट निर्देशकया नं सिरपा त्याकेत ताःलाःगु खः । थुगु ख्यालः भाजु गणेशराम लाछिजुं च्वयादीगु खःसा भाजु आर्यन नःकमिं निर्देशन यानादीगु खः ।

निन्हुया न्हि थौं थीथी प्यंगु ख्यालः न्ह्यब्वःगु खः। उकी मध्ये थौं न्हापां न्ह्यःब्वःगु ख्वप सांस्कृतिक पुचः ख्वपया “थ्व छु जूगु?” ख्यालः ल्यू लायेत ताःलाःगु खःसा म्हिगः थेच्व साँस्कृतिक मंकाः खलः,थेच्वं न्ह्यब्वःगु “इमर्जेन्सि सराद” ख्यालः लियांल्यू लाःगु खः । अथेहे थौं दक्कले लिपां न्ह्यब्वःगु प्रथमाञ्जली नासः खलःया “छन्त नं थथे याये यःला?” नांगु ख्यालकं हःपा सिरपा त्याकूगु खः ।

अथेहे उत्कृष्ट मिजं प्याखँम्वःया सिरपा “छन्त नं थथे याये यःला?” ख्यालकय् अबुजुया म्हितादीम्ह उमेश स्थापितं त्याकादीगु खःसा उत्कृष्ट समाःया सिरपा नं थुगु ख्न्यालया मिरा डंगोलं त्याकादीगु खः ।

उत्कृष्ट मिसा प्याखँम्वः कथं “इमर्जेन्सि सराद” ख्यालःया शान्ता महर्जनं त्याकादीगु खःसा उत्कृष्ट दबू छाय्पाया सिरपा “ह्विलचियरं कुतुंवःम्ह नेवाः” ख्यालःया कविर महर्जनं त्याकादीगु खः ।

मूपाहाँ ख्याली जुजु मदनकृष्ण श्रेष्ठ, मुनासःया संस्थापक नायः श्रीराम श्रेष्ठ, किपू नगरपालिकाया नगर प्रमुख कृष्णमान डंगोल, मुनासःया नायः सुरेन्द्र तुलाधरपिंसं सिरपा देछानादीगु खः । न्हाप, ल्यू, लियांल्यू व हःपा सिरपा लाःपिंत छसिकथं न्यय्द्वः, स्वीद्वः, नीद्व व झिद्वः दां लिसें ट्रफि, मेडल दसिपौ लःल्हानादीगु खः । उत्कृष्ट च्वमि, निर्देशक, उत्कृष्ट मिजं प्याखँम्वः उत्कृष्ट मिसा प्याखँम्वः, उत्कृष्ट दबू छाय्पा व उत्कृष्ट समाः ताःलाःपिंत म्हतिं न्याद्वः न्याद्वः तकाः दांलिसं दसिपौ लःल्हानादीगु खः ।