मुनासःया ख्यालः कासा न्ह्यात

निन्हुयंकं जुइगु स्वनिगः ब्यापि मुनासः ख्याल धें धें बल्ला कासा - ११४६ थनिनिसें न्ह्याःगु दु । थ्यंमथ्यं न्यय्दँति हे न्ह्यः मुनासः नांया संस्थां धें धें बल्ला कासा याना न्ह्याकूगु थुगु कासा थौंकन्हय् व हे मुनासः संस्थायात न्हूधाःयाना थनिनिसें व हे धें धें बल्ला कासायात निरन्तरता ब्यूगु खः ।

सामाजिक व राजनैतिक विकृतियात उलाः सुशासन व सुव्यवस्था यायेया निति मूवंगु भूमिका म्हितीगु नेपालभाषाया छगू स्यल्लागु विधा खः ख्यालः । अतिकं न्ह्यइपुइगु ख्याली न्हिली जाइगु थुगु विधा ख्यालः नेवाःतय् थाय् थासय् क्यनीगु यानाच्वंगु खः । खासयाना गुंपुन्हिया झाःलय् थ्व ख्यालः दयेका म्हितीगु/क्यनीगु खः।

थौं व कन्हय् जुइगु थुगु ख्यालः धें धें बल्ला कासाया थौं न्हापांगु न्हि नेपाल पुलिस क्लबया हलय् मूपाहाँपिं ख्याली जुजु मदनकृष्ण श्रेष्ठ व हरिवंश आचार्यं मंकाःकथं त्वाःदेवाय् मत च्याका उलेज्या यानादीगु खः । मुनासःया संस्थापक नायः श्रीराम श्रेष्ठ, नेपालभाषा एकेडेमिया चान्सलर नेवाः न्ह्यलुवा मल्ल के.सुन्दरपिंसं नेपालभाषाया ख्यालः विधाय् मुनासःया महत्व व योगदानया बारे कुलादीगु खः । मुनासःया नायः सुरेन्द्र तुलाधरया नाय:सुई न्ह्यागु उलेज्या ज्याझ्वलय् न्वकू लक्ष्मीकुमार महर्जनं लसकुस यानादीगु खःसा छ्याञ्जे सुरज व्यञ्जनकारं न्ह्याकादीगु खः ।

उलेज्या ज्याझ्वः धुंकाः थौं स्वंगु ख्यालः न्ह्यब्वःगु खः । न्हापां यल महानगरपालिका १६ वडा कलाकार समिति,यलया न्ह्यब्वया सुरजवीर वज्राचार्यं च्वयादीगु व राजेशमान सिंहं निर्देशन यानादीगु “धुकूया चुकू” न्ह्यब्वःगु खः । अनंलिपा थेच्व साँस्कृतिक मंकाः खलः, थेच्वया न्ह्यब्वया हरिराम महर्जनं च्वयादीगु व राजेन्द्र महर्जनं निर्देशन यानादीगु “इमर्जेन्सि सराद” ख्यालः न्ह्यब्वःगु खः । अथेहे थौं लिपांगु कथं सन स्टार क्लब, किपूया न्ह्यब्वया भरत महर्जनं च्वयादीगु व निर्जला महर्जनं निर्देशन यानादीगु “ह्विलचियरं कुतुंवःम्ह नेवाः” ख्यालः न्ह्यब्वःगु खः ।