मुनासः ख्यालः कासाया “टाइसिट” पिदन

नेपालभाषाया साहित्यय् थीथी विधात मध्ये छगू विस्कं न्ह्याइपुगु विधा खः ख्यालः । ख्यालः विधां हे सामाजिक व राजनैतिक विकृतियात उलाः सुशासन व सुव्यवस्था यायेया नितिं मूवंगु भूमिका म्हितीगु स्यूगुहे खँ खत । थ्यंमथ्यं न्ययदँ न्ह्यः थथे हे सामाजिक व राजनैतिक विकृतियात ध्याचूनकाः सुशासन व सुव्यवस्थाया नितिं ख्यालः मार्फत खबरदारी याःगु संस्था खः मुनासः । व हे मुनासः संस्थायात इलं हिलांवंलिसें न्हूधाः याना न्हापाया व हे ज्यायात हाकनं निरन्तरता बीगुया नितिं थुगुसी निसें हाकनं ख्यालः कासा याःगु खः ।

“स्वनिगः ब्यापि मुनासः ख्यालः धेंधें बल्ला कासा– ११४६” या नामं जुइगु थुगु ख्यालः कासा थ्वहे वइगु ने.सं. ११४६ यंलागा एकादशि व द्वादशि (२०८३ असोज २० व २१ गते, मंगवाः व बुधवाः) जुइगु जानकारी ब्यूगु दु ।

महेन्द्र पुलिस क्लव, प्रशर्दनी मार्ग,येँ जुइगु थुगु ख्यालः कासाया झ्वलय् बिहिवाः नासः पुजा याना ख्यालःया टाइसिट पितब्यूगु दु । क्षेत्रपाटी पार्टी पालेसय् जूगु ज्याझ्वलय् थीथी ७ गू खलकं ब्वति काःगुया टाइसिट पितब्यूगु खः । ब्वतिकयादीगु खलःपुचःया हे प्रतिनिधिपिं दुथ्याकाः टाइसिटया धलः दयेकूगु खः ।

धलःकथं न्हापांगु न्हि असोज २० गते न्हापां यल महानगरपालिका १६वडा कलाकार समिति, यलया न्ह्यब्वया सुरजवीर वज्राचार्यं च्वयादीगु व राजेशमान सिंहं स्यनादीगु “धुकूया चुकू” ख्यालः न्ह्यब्वइगु जूगु दुसा ल्यू थेच्व साँस्कृतिक मंकाः खलः, थेच्व, यलया न्ह्यब्वया हरिराम महर्जनं च्वयादीगु व राजेन्द्र महर्जनं स्यनादीगु “इमर्जेन्सि सराद” नांगु ख्यालः न्ह्यब्वइगु जूगु दु ।अथेहे लियांल्यू कथं सन स्टार क्लव, किपूया न्ह्यब्वया भरत महर्जनं च्वयादीगु व निर्जला महर्जनं स्यनादीगु “ह्विलचियरं कुतुंवःम्ह नेवाः” नांगु ख्यालः न्ह्यब्वइगु खः ।

अथेहे लिपांगु न्हि असोज २१ गते न्हापां ख्वप साँस्कृतिक पुचः, ख्वपया न्ह्यब्वया रवि ख्याजुं च्वयादीगु व वयकलं हे स्यनादीगु “थ्व छु जूगु ?” नांगु ख्यालः न्ह्यब्वइगु खः । ल्यूकथं फोकस पिक्चर्स, किपूया न्ह्यब्वया प्रदिप खड्गीं च्वयादीगु व वयकलं हे स्यनादीगु “कयता मदुम्ह गनेद्यः” नांगु ख्यालः न्ह्यब्वइगु खः । लियांल्यू कथं नेपालभाषा सिनेमा विकास केन्द्र, येँया न्ह्यब्वया गणेशराम लाछिं च्वयादीगु व आर्यम नकःमिं स्यनादीगु “कयता तंम्ह नेवाः” नांगु ख्यालः न्ह्यब्वइगु खःसा दक्कले लिपांकथं प्रथमाञ्जलि नासः खलः, येँया न्ह्यब्वया निर्मल वज्राचार्यं च्वयादीगु व राजु स्यस्यं स्यनादीगु “छन्त नं थथे याये यःला ?” नांगु ख्यालः न्ह्यब्वइगु जूगु दु ।

ज्याझ्वलय् न्हाप, ल्यू, लियांल्यू व हःपा सिरपा ताःलाइपिंत छसीकथं न्ययद्वः, स्वीद्वः, नीद्वः व झिद्वः दां लिसें मेडल व दसि पौ लःल्हायेगु जानकारी बियादीगु खः ।

मुनासःया संस्थापक छ्याञ्जे ख्याली जुजु मदनकृष्ण श्रेष्ठं नासःपुजाया सिन्हः तिकाः सुवाः बियादीगु ज्याझ्वः मुनासःया न्वकू लक्ष्मी कुमार महर्जनं लसकुस यानादीगु खः । मुनासःया नायः सुरेन्द्र तुलाधरया नायःसुइ न्ह्याःगु ज्याझ्वः छ्याञ्जे सुरज व्यञ्जनकारं न्ह्याकादीगु खः ।