प्रमया संवोधनय् त्वःफिके मजिउगु खँ

प्रधानमन्त्री माधव नेपालं विपक्षी पार्टी माओवादीलिसे जुयाच्वंगु तनाव म्हो यायेगु लागिं याकनं हे देशवासीया नामय् संवोधन यायेगु तयारी जुयाच्वंगु दु । उकिया लागिं एमाले व माओवादी पार्टीया नेतातय् दथुइ खँल्हाबल्हा जुयाच्वंगु दुसा आपालं खँय् सकारात्मक संकेत वःगुलिं थ्व संवोधन लिपा देशय् कायम जुयाच्वंगु राजनीतिक तनावयात म्हो याइगु आशा कायेथाय् दु । उकिं थ्व खँयात लुमंकेगु खःसा प्रमया संवोधन अतिकं महत्वपूर्ण जुइगु खँय् शंका मदु ।

तर आः जुइगु प्रमया संवोधनय् केवल माओवादीलिसे जुयाच्वंगु राजनीतिक तनावयात जक संवोधन यानाः देशय् शान्ति कायम जुइ धकाः आशा याःगु खःसा व गलत जुइ । छाय्धाःसां आः देशय् माओवादीया जक समस्या मखु थीथी जातीय पुचःतय्सं बिस्कं स्वायत्त राज्यया माग यानाः थना हयाच्वंगु आन्दोलन नं मू समस्याया रुपय् न्ह्यःने वःगु दु । सरकारं उकियात नं संवोधन यायेमाःगु आवश्यकता दु । यदि थुकियात संवोधन यायेगु त्वःफित धाःसा माओवादीया आन्दोलन ला स्थगित जुइगु जुइ तर जातीय पुचःतय्सं यानाच्वंगु आन्दोलनं धाःसा हानं उच्चता कायेफु । थौं नेपाः संघीय व्यवस्थाय् प्रवेश जुइत्यंगु हे थीथी जातीय पुचःतय् पहिचानयात कायम यायेगु लागिं खः । तर थौं देशय् गुगु कथंया राजनीतिक माहौल पिहां वयाच्वंगु खः उकियात कयाः धाःसा फुक्क धइथें जातीय पुचःतय्सं थःपिंसं यानाच्वनागु माग पूवनी धइगु खँय् शंका यानाच्वंगु दु । उमित आश्वस्त यायेगु नं सरकार व फुक्कं राजनीतिक पार्टीतय्गु कर्तव्य खः । आः प्रमपाखें जुइगु संवोधनय् थुकिया उल्लेख मजुल धाःसा देश हानं नं अशान्त हे जुइ ।

More Stories Like this