नेपालभाषा ब्वंकीगु ब्वनेकुथि दथुइ न्ह्यसःलिसः कासा
यें (सन्ध्या टाइम्स) / नेवाः स्यनामि दबू नेपालमण्डलपाखें नेपालभाषा ब्वंकातःगु २१ गू ब्वनेकुथि मध्यय् खुगू ब्वनेकुथि दथुइ जूगु निगूगु चरणया नेवाः न्ह्यसः लिसः कासा म्हिगः परोपकार उमाविइ जुल ।
कासाय् हिमालय मावि न्हाप लाःगु खः । अथे हे लिउ श्रीकन्या मावि व लियांलिउ महाकाल मावि लाःगु खः । थ्व बाहेक कासाय् परोपकार उमावि बालविकास निमावि व जनप्रभात माविं नं ब्वति काःगु खः । कासाय् त्याःपिंत परोपकार उमाविया उपप्रधानाध्यापक चुडामणि वज्राचार्यं सिरपाः लःल्हानादीगु खः ।
