कमजोर शासन हे विकासया पंगः
यें (सन्ध्या टाइम्स) / नेपाःया विकासय् कमजोर शासन हे तःधंगु पंगः जुयाच्वंगु खँ नेपाःयात ग्वाहालि यानाच्वंगु स्वंगू प्रमुख दातृ निकायं धाःगु दु । देशय् न्हियान्हिथं जुयाच्वंगु बन्द हडताल व राजनीतिक अस्थिरतां यानाः नेपाःया विकास तीव्र मजूगु निष्कर्ष नं उमिसं पिकाःगु दु ।
बेलायतया डिएफ- आइडी एडिबी व अन्तर्राष्ट्रिय श्रम संगठनं मंकाः रुपं याःगु अध्ययनं थज्याःगु लिच्वः पिकाःगु खः ।
उगु अध्ययनय् शासन प्रणाली कमजोर जूगुलिं विकासया निंतिं दकलय् आवश्यक ध्यबा लगानी यायेत मनूत ग्यानाच्वंगु खँ नं न्ह्यथनातःगु दु ।
डिएफआइडीया नेपाल प्रमुख सारा सान्याहुम्बीया कथं राजनीतिक अस्थिरता व कमजोर शासनं लगानीकर्ता- तय्त ख्यानाच्वंगु दु ।
अनुशासनया उल्लंघनं नं विकासया ज्याय् मिछंगु अवस्था ब्वलनाच्वंगु खँ नं प्रतिवेदनय् न्ह्यथनातःगु दु । प्रतिवेदनय् गबलें क्वमचाइगु बन्दया श्रृंखलायात त्वाःथले मफुतले व बल्लाःगु शासन व्यवस्था मयाःतले विकास व गरिबी निवारणया ज्या मन्ह्याइगु ठहर यानातःगु दु ।
