सरकारं थौं नं पूर्णता मकाइगु
यें (सन्ध्या टाइम्स) / सरकार गठन जूगु स्ववाः दयेधुंकलं नं सरकारयात पूर्णता बी मफयाच्वंम्ह प्रधानमन्त्री माधव नेपालं थौं नं थ्व ज्या क्वचायेके फइगु सम्भावना मदुनि ।
सरकारयात पूर्णता बीत प्रम नेपालं थौं फोरमया नेता व उपप्रधानमन्त्री विजय गच्छदारलिसे सहलह ब्याकादीगु खःसां छुं निष्कर्ष धाःसा पिकाये मफुत । सहलहया झ्वलय् नेता गच्छदारं थःपिंत न्यागू मन्त्रालय व प्यंगू राज्य मन्त्री माः धकाः अडान कायेवं वार्ता निष्कर्षबिहिन जूवंगु खः । उगु बैठकय् प्रम नेपालं न्हापा थें हे फोरमयात प्यंगू मन्त्रालय भाग बीगु प्रस्ताव न्ह्यःने तयादीगु खः ।
उखे कांग्रेस लिसे थौं जुइ धाःगु सहलह मजुइगु जूगु दु । कांग्रेस नेत्री शैलजा आचार्य मदुगुलिं कांग्रेसं थौं ई बी मफइगु खँ धासें बैठक स्थगित याःगु खः ।
