याकनं सेना समायोजन याः : अमेरिकी उपविदेशमन्त्री
अमेरिकी उपविदेशमन्त्री रोवर्ट ओ. ब्लेकं शान्ति प्रकृयायात निष्कर्षय् थ्यंकेत याकनं सेना समायोन यायेमाःगु बीचाः प्वंकादीगु दु ।
निन्हुन्यंकया नेपाः भ्रमणय् झयादिम्ह उपविदेशमन्त्रीं थौं प्रधानमन्त्री माधवकुमार नेपाल नाप नापलायेगु झ्वलय् सेना समायोजन याकनं यानाः शान्ति प्रकृयायात तार्किक निष्कर्षय् थ्यकेत इनाप यानदीगु खः । वयेकलं माओवादी शिविरय् दुपिं मस्तय्त तत्काल छेँ लिहांवनेगु व्यवस्था मिलेयायेत प्रधानमन्त्री नाप नं इनाप यानादीगु दु ।
प्रधानमन्त्री व उपविदेशमन्त्री दथुइया खँल्हाबंलाय् अनमिनया भूमिका बारे नं खँ जूगु खः । उगु ईलय् प्रधानमन्त्री नेपालं शान्ति प्रकृयाय् अनमिनया भूमिका तसकं महत्वपूर्ण जूगु धासें शान्ति प्रकृया पूमवंतल्ले अनमिनया भूमिका नं समाप्त मजुइगु धयादिल ।
अथेहे खँल्हाबंलाया झ्वलय् उपविदेशमन्त्री ब्लेकं नेपालय् अमेरिकां आर्थिक लगानी यायेत इच्छुक जूगु धासें उकीया निंतिं उपयुक्त वातावरण देयेके प्रधानमन्त्रीयात इनाप यानादीगु ख: ।
नेपाःया भ्रमणया झ्वलय् उपविदेशमन्त्री ब्लेकं राष्ट्रपति डा. रामवरण यादव, कांग्रेस सभापति गिरिजाप्रसाद कोइराला, मोओवादी अध्यक्ष पुष्पकमल दाहाल 'प्रचण्ड', एमाले अध्यक्ष झलनाथ खनाल लगायत नेतातय्त नापलयेगु ज्याझ्वः दु ।
