सैलजा आचार्य मन्त
नेपाःया प्रजातान्त्रिक आन्दोलनय् ताः इलंनिसें योगदान याना वयाच्वंम्ह मिसा नेतृ सैलजा आचार्य थौं सुथय् मन्त । निमोनिया व मुटुया ल्वचं कयाच्वंम्ह सैलजा सिकिस्त जुइवं वंगु वुधवाः महाराजगंजया शिक्षण अस्पतालय् भर्ना याःगु खः । उपचारया क्रमय् थौं सुथय् साढे चार बजे वय्कः मन्त ।
खुइन्यादँ दुम्ह आचार्य निदँ न्ह्यः निसें उसाँय् मदुम्ह खसा: वंगु बुधवाः ल्वय् तःच्वयेवं अस्पताल भर्ना याकूगु खः । थौं वयेकया अन्तिम श्रद्धान्जलिया निंतिं सुथय् गुताः ईलं निसें झिनिताः तक कांग्रेस पार्टी ज्याकूथी सनेपा तइगु व झिंनिताः ई लिपाः पशुपति आर्यघाटय् अन्तिम संस्कार याइगु जूगु दु ।
२०१७ सालय् तत्कालीन जुजु महेन्द्रयात हाकूगु ध्वाँय क्यंगुलिं स्वदँ जेल चालन जुम्ह आचार्य नेपाःया न्हापाम्ह मिसा उपप्रधानमन्त्री खः । जेल जीवन लिपा भारतय् निर्वासित जीवन हनादिम्ह आचार्य २०३३सालय् विश्वश्वरप्रसाद कोइरालाया मेलमिलाप नीति लिपा कोइराला नापं नेपाः लिहांझाःगु खः । अन लिपा आचार्य नेपाःया राजनीति सक्रिय जुयादीगु खः ।
वयेकलं २०४८ सालया आमनिर्वाचनय् मोरङ-५ पाखें प्रतिनिधिसभाया निर्वाचनय् त्यानादिगु खसाः वहे निवार्चन लिपाः गठन जूगु सरकारय् वयेक कृषिमन्त्री जुयादीगु खः । अथेहे २०५१ सालया मध्यावधी निर्वाचनय् मोरङ-७ पाखें पुन निर्वाचित जुयादिम्ह आचार्य २०५४ सालया संयुक्त सरकारय् उपप्रधानमन्त्री व जलस्रोत मन्त्री जुयादीगु खः ।
अथेहे २०५६ सालया निर्वाचनय् धासाः पराजित जुयादिम्ह कांग्रेस नेतृ १९ माघ २०५९या तत्कालीन जुजु ज्ञानेन्द्रया शाही कु लिपा राजसंस्था व दलत मिलेजुया वनेमाःगु सर्वाजनिक अभिव्यक्तिया कारण आलोचनाया पात्र जुयादीगु खः ।
कांग्रेसया झिंछक्वगू महाधिवेशनं आचार्य केन्द्रीय दुजःलय् निर्वाचित जुयादीगु खः ।
