एमालॆया प्रस्ताव माओवादीपाखें अस्वीकार
राष्ट्रपतिया असंबैधानिक कदम लित कायेगु व रुक्मांगद कटवालया अवकासया विषयसं एमालें याकचां निर्णय यायेमफइगु धायेवं थौं च्वंगु माओवादी एमालेया बैठक बिना निष्कर्ष क्वचाःगु दु । मंगलबाः यलया गोदावरीइ माओवादी व एमालेया शीर्ष नेतादथुइ जूगु मौखिक सहमतियात लिपांगु रुप बिइत दयेकूगु निगू दलिय कार्यदलया थौं च्वंगु बैठक विना निस्कर्ष क्वचाःगु खः । निगू दल दथुइ जूगु सहमतिकथं एमालें तयार याःगु प्यंगू वँुदे सहमतिया मस्यौदाय् सहलह जूसां न सहमति निस्कर्ष पिहाँवयेमफुगु खः ।
एमालेपाखें माओवादीयात म्हिगः लःल्हाःगु मस्यौदाया न्हापांगु वुँदाय् प्रधानसेनापति रुक्माङगद कटवालयात बर्खास्त यायेगु न्हापांगु सरकारया निर्णयलिपा उत्पन्न गतिरोध राजनीतिक दलया समझदारीइ अन्त्य यायेगु न्ह्यथनातःगु दु । एमाले प्रस्तावय् न्ह्यथनाक्तगु उगु बुँदां माओवादीया मागयात सम्बोधन मयाःगु माओवादी नेता नारायणकाजी श्रेष्ठ प्रकाशं जानकारी बियादीगु दु । मेगु विषयसं सहमति जूसां नं राष्ट्रपतिया कदम लित कायेगु विषयसं थौंया वैठकय् सहमति जुइमफयेवं वैठकलिपा माओवादी सचिवालय दुजः देव गुरुङं जनकारी बियादीगु दु । उगु विषयसं एमाले याकचां सहमति यायेमफइगु जूगुलिं काँग्रेश लगायत मेगु दलतलिसे सहलह यानाः जक सहमतिइ थ्यंकेफइगु धासें ईया माग यायेवं बैठक बिना निष्कर्ष क्वचाःगु खः ।
