माओवादी व एमालेया नेतात हालाच्वन - सहमति लिक्क थ्यन

एकीकृत नेकपा माओवादी व नेकपा एमालेया नेतातय्सं लिपांगु खुसिइ जूगु सहलह सकारात्मक जूगु धासें सहमति जूसा थौं हे व्यवस्थापीका सदनया बैठक न्ह्याइगु जानकारी ब्यूगु दु । एकीकृत माओवादीया नेता पोष्टबहादुर बोगटी दिवाकरं थःपिंसं सदन व सतकपाखें राष्ट्रपतिया असवैधानिक कदमया विरोधय् न्ह्याकाच्वंगु आन्दोलनयात प्रधानमन्त्रीं सम्वोधन यायेगु व दलतदथुइया सहलह यायेगु सहमति जूसा थौं हे सदन अवरोध चायेकेगु धयादीगु दु ।

जनसाचार अभियानया साक्षात्कारय् न्वंवासें एमालें तःगु प्रस्तावया विषयसं सैद्धान्तिकरुपं सहमति जूसां नं भाषागतरुपं खँ मिलय् जुइल्यंदनीगु धासें उकि नं सहमतिइ थ्यंकेगु विश्वास प्वंकादीगु दु । दिवाकरं राष्ट्रपितं न्ह्याकूगु कदमं लोकतन्त्रया गःपः तिइगु कुतः याःगु थुकिया रक्षाया नितिं थःपिंसं आन्दोलन न्ह्याकाच्वंगु धयादीगु दु । थःपिं सहमति व सहकार्य स्वयां पिहाँ वनेगु बिचारय् दुगु नं वय्कलं स्पष्ट यानादीगु दु । ज्याभुवलय् एमाले संसदीय दलया प्रमुख सचेतक भीमप्रसाद आचार्यं एमालें न्ह्यःने न्ह्याकूगु सहमतिया प्रस्तावया विषयसं माओवादीलिसे सहलह न्ह्याःगु व थौं तक सहमतिइ थ्यंकाः सदन सुचारु जुइफुगु धयादीगु दु । सेनापतिदथुइ कार्वाही राष्ट्रपतिया कदम लगायत विषयसं राष्ट्रिय सहमति मालाः न्ह्यःने न्ह्यायेगुया विकल्प मदुगु वय्कलं धयादीगु दु । माओवादीं ल्ह्वंगु मागबारे प्रधानमन्त्रीं संवोधन यायेगु व सदन चायेकेगु कुतलय् थःपिं दुगु आचार्यं धयादीगु दु । आचार्यं इलय् हे संविधान निर्माण यायेत व शान्ति प्रकृयायात निष्कर्षय् थ्यंकेत दलतदथुइया एकताय् बह ब्यूगु दु ।