एमालेय् विवाद मज्यंनि
नेकपा एमालेया न्ह्याःगु केन्द्रीय समितीया वैठकय् वैचारीक व संगठनात्मक जिम्मेवारीया नितिं नेतातदथुइ तीव्र विवाद खनेदुगु दु । पार्टी दुने तसकं महत्व तइगु संगठन विभाग व प्रशिक्षण विभागया नितिं झलनाथ खनाल पक्ष व केपी ओली पक्षदथुइ विवाद खनेदुगु दु ।
खनाल पक्षं पार्टी स्कुलिङ विभागया प्रमुखय् वामदेव गौतमयात व संगठन विभागया प्रमु्खय् अशोक राईयात प्रस्ताव याःसां नं ओली पक्षं संस्थापन पक्षया प्रस्तावयात अस्वीकार याःगु दु । पार्टी स्कुलिङ विभागया नेतृत्व थःत दयेमाःगु अडानलिसे म्हिगः न्हिच्छि विवाद याःसां नं लिपावयाः ओली विदेश विभाग प्रमुखय् च्वनेत सहमत जूगु एमाले स्रोतं जानकारी ब्यूगु दु । गौतमयात स्कुलिङ विभागयो नेतृत्व ब्यूसा माओवादीलिसे एकताया प्रशिक्षण बियगु व पार्टीयात वैचारीक रुपं माओवादीइ विलय यायेफइगु ओलीया तर्क दुगु संस्थापन पक्षया हे छम्ह नेतां जानकारी बियादीगु दु ।
थौंया वैठकं थीथी विभागया प्रमुखत क्वःछ्यूसां नं दुजःत धाःसा प्रमुख थःम्हं क्वःछिना मेगु केन्द्रीय समितीया वैठकय् प्रस्तावयारुपं हयेमालीगु जूगु दु ।
