प्रधानमन्त्री व यूएईया विदेश मन्त्री दथुइ खँल्हाबंला
छन्हुया निंतिं नेपाः भ्रमणय् झायादिम्ह संयुक्त अरब ईमिरेट्सया विदेश मन्त्री शेख अब्दुल्लाह विन जेहितं प्रधानमन्त्री माधवकुमार नेपाल नाप खँल्हाबंला यानादीगु दु ।
बिहिवाः प्रधनमन्त्रीया ज्याकूथी सिंहदरवारय् जूगु खँल्हाबंलाय् निगू देय दथुइया विकास निर्माण यायेत लगानी व आपसी सम्वापूया बारे खँल्हाबंला जूगु खँ विदेश मन्त्री अब्दुलाह विन जेहितं संचारकर्मीतय्त जानकारी बियादिल । अथेहे प्रधानमन्त्री नेपालनाप यूएईया महावाणिज्य दुतावास चायेकीगु बारे सकारात्मक खँल्हाबंलां जूगु धासें विदेशमन्त्री जायदं संचारकर्मीतय्त दच्छिया दुने महावाणिज्य दुतावास चायेकीगु जानकारी बियादीगु दु ।
अथेहे प्रधानमन्त्री नेपालं विदेशमन्त्री जेसहतयात नेपाःया विकासया निंतिं पर्यटन, हाइड्रो पावर व विकासया मेमेगु ख्यःलय् ग्वहालि यायेत इनाप यानादीगु खँ प्रधानमन्त्रीया विदेश मामिला सल्लाहकार राजन भट्टराईं जानकारी बियादिल ।
खँल्हाबंलाय् ऊर्जा संकट सम्बन्धी निस्वनेत्यंगु अन्र्राष्ट्रिय वैकल्पिक ऊर्जाया विषयस नं सहलह जूगु खः ।
अथेहे थौं हे विदेशमन्त्री जायदं नेपा:या परराष्ट्रमन्त्री सुजाता कोइराला नाप नापलाना यूएईं निजी ख्य: मार्फत् नेपा:लय् जलविद्युत् व पर्यटन क्षेत्रय् लगानी यायेत इच्छुक जूगु खँ धयादीगु ख: ।
