न्यातपौ स्वयेगु पुखू जीर्णोद्धार
ख्वप (सन्ध्या टाइम्स) / गथे पोखराया फेवा तालय् माछापुच्छ्रे हिमालया किपा प्रस्टं स्वये फइगु खः पाय्छि अथे हे ख्वपय् नं नांजाःगु न्यातपौ देगः प्रस्टं स्वये जिउगु छगू पुखू दु । न्यासि वनेबलय् न्यातपौ स्वयां १५ मिनेट व दूरीया ल्याखं १ किलोमिटर ति तापाःगु उगु पुखूयात स्थानीय जनतां खंचा पुखू धाइ । वडाया हिसाबं न्यातपौ ख्वप नपाया ११ वडाय् लाःसा थ्व पुखू ६ वडाय् लाः । तर उलिमछि तापाक च्वंसां थ्व पुखुली न्यातपौया किपा धाःसा गजबनक्सां प्रस्ट जू ।
धाइ थिनं स्वसःदँ न्ह्यः न्यातपौ देगः दयेकूगु इलय् हे थ्व पुखू नं दयेकूगु खः ।
तर वंगु छुं ई न्ह्यवंनिसें पुखुली लः मदयाः थुकिया ऐतिहासिक महत्व तनाच्वंगु खः । आः स्थानीय जनतां पुखू जीर्णोद्धार यानाः अन लः तयेगु व हानं न्हापा थें हे न्यातपौ प्रस्ट स्वये जीकेगु कुतः याःगु दु ।
ख्वप नगरपालिकां आः उगु पुखूयात ३० इन्च गाः अप्वः म्हुयाः लः च्वनीगु कथं दयेकेत्यंगु दु । लः मदयाः वंगु निदँति न्ह्यःनिसें पुखू छगुलिं फोहोर वायेगु थाय् जुयाच्वंगु खः ।
स्थानीय बुद्धिजीवि आशाकाजी वनमालाया संयोजकत्वय् नीस्वंगु उपभोक्ता समितिं ६ लाख ७४५ तका खर्च यानाः अन न्या लहीगु व पर्यटक सालेगु थाय् कथं विकास यायेगु ग्वसाः दयेकूगु दु । वंगु बुधवाःनिसें डोजर हयाः अन जीर्णोद्धार नं शुरु याःगु खः । जीर्णोद्धार लिपा अन न्हापा थें हे न्यातपौ देगः स्वये जीगु खँ उपभोक्ता समितिया दुजः कृष्णप्रसाद शिवहरिं सन्ध्या टाइम्सयात कनादिल ।
