येँय् नं मचा अपहरणया कुतः
यें (सन्ध्या टाइम्स) / देय्या थीथी थासय् मस्त अपहरण याइगु समाचार पिहां वयाच्वंगु हे इलय् थौं राजधानी येँय् नं छम्ह मचायात अपहरण यायेगु कुतः जूगु दु ।
थौं सुथय् स्कूलय् वनाच्वंम्ह १० दँया मिसामचा मोनिका श्रेष्ठ पियायात बालाजु क्षेत्रं अपहरण याना यंकूगु खःसा तत्काल हे प्रहरी व स्थानीय जनताया सक्रियताय् मचायात स्वयम्भूं अपहरणमुक्त याःगु खः ।
मचायात मुक्त यायेगु झ्वलय् प्रहरीं निम्ह अपहरणकारीतय्त नं ज्वंगु दु । उपिं छम्ह नुवाकोटया रवि श्रेष्ठ खःसा मेम्ह काभ्रेया विदुर गिरी खः ।
अपहरणकारीतय्सं सौरदीप बोर्डिङ स्कूलय् ब्वनीम्ह उम्ह मचायात अपहरण याःगु खः । अपहरण घटनायात कयाः स्थानीय जनतां छझाः बालाजु प्रहरी चौकीइ नं धर्ना बिउगु खः । थुकिया बारे बालाजु प्रहरी चौकीइ न्यनेकने यानाबलय् अनं धाःसा छुं हे खँ कने चाहे मजू । अपहरणकारीतय्त हनुमानध्वाखाय् यंकेधुंकूगु दु धासें फोनं छुं हे खँ धायेमते धइगु निर्देशन बियातःगु जानकारी बिल ।
