नेवाःतय् मंकाः ध्वाँय् दयेकीगु
यें (सन्ध्या टाइम्स) / नेवाः स्वायत्त राज्य प्राप्त यायेगु लागिं आन्दोलन यानाच्वंगु नेवाः स्वायत्त राज्य मंकाः संघर्ष समितिं आः नेवाः आन्दोलनय् सकलें नेवाःतय्सं क्वबी फइगु मंकाः ध्वाँय् दयेकीगु जूगु दु । सकलें नेवाःतय् मंकाः ध्वाँय् दयेकाः वयां लिपा न्ह्यागु आन्दोलन वा उत्सवय् नं वहे ध्वाँय् ब्वयेकेगु ग्वसाः नं संघर्ष समितिं दयेकूगु दु ।
संघर्ष समितिं बिउगु जानकारी कथं अज्याःगु नेवाः ध्वाँय् डिजायन यायेगु निंतिं आः याकनं हे नेवाः कलाकारतय्त आह्वान नं यायेत्यंगु दु । नेवाः कलाकारतय् दथुइ खुल्ला धेंधेंबल्लाः यानाः डिजायन तयार याकेगु खँ नं संघर्ष समितिं धाःगु दु ।
सुयागु ध्वाँय् स्वीकारयाइ उम्ह कलाकारयात दां सिरपाःया नापं सार्वजनिक अभिनन्दन समेत यायेगु खँ नं धाःगु दु ।
थौंकन्हय् नेवाःतय् आन्दोलन वा उत्सवया ज्या जुइबलय् थःथः पुचःतय्सं थःथःगु हे ध्वाँय् ज्वना वइगुलिं उकिं मेगु खलः पुचःया दुजःतय्सं मिछंगु महसुस याये मालाच्वंगु दु । यदि नेवाःतय् मंकाः ध्वाँय् दत धाःसा थुकिं नेवाः म्हसीकायात अझ च्वन्ह्याकीगु आशा यानातःगु दु ।
नेवाः ध्वाँय् तयार जुल कि सकलें नेवाःतय्सं छगू तःधंगु उत्सवया दथुइ उकिया झण्डोत्तोलन समेत यायेगु बिचाः जुयाच्वंगु खँ नं धाःगु दु । नेवाः ध्वाँय् सार्वजनिक जुइधुन कि नेपालमण्डल लागाया सम्पूर्ण नेवाःतय् छेँखा छेँखाय् हे उगु ध्वाँय् ब्वयेकेगु खँ धाःगु दु ।
