माओवादीं या:गु बन्दं देया थीथी थाय् प्रभावित
वीरगंजय् माओवादी विरुद्ध प्रदर्शन
माओवादी निकट थीथी भातृ संगठनतय्सं आव्हान याःगु अवध, मिथिला व भोजपुर बन्दं अधिकांश तराई लागाःया जनजीवन प्रभावित जूगु दु ।
बिहिवाः अवध राज्य बन्दया कारणं रुपन्देहीया कपिलवस्तु व नवलपरासी जिल्ला प्रभावित जूगु दु । बन्दया अवज्ञा याःगु धासें माआवादी कार्यकर्तातय्सं बुटवलय् खुगः सवारीसाधनय् तोडफोड याःगु दु । बन्दया कारणं बुटवल व नापंया जिल्ला दक्व बन्द जूगु दुसाः सिद्धार्थ राजमार्गय् चलेजुइगु सवारी साधनत ठप्प जूगु दु ।
अथेहे बन्दया झ्वलय् वीरगंजय् स्थानीय छगू विद्यालयया विद्यार्थीतय्सं माओवादी विरुद्ध प्रदर्शन याःगु दु । माओवादी कार्यकर्तातय्सं मिनी ल्याण्ड विद्यालयया प्रधानाध्यापक लालबाबु पटेलयात दुव्र्यवहार याःगु व विद्यालय बन्द याकेत दबाव ब्यूगु विरोद्धय् अनया विद्यार्थीतय्सं माओवादी विरुद्ध प्रदर्शन याःगु खः । विद्यार्थीतय्सं माओवादीं लँ पनेत च्याकूगु टायर स्यायेगु व माओवादीया झण्डा तकं च्याका ब्यूगु खः । तर माओवादीया पर्सा इन्जार्चं धासाः बन्द कुन्हु विद्यालय चायेकूगुलिं विद्यालय बन्द यायेत जक इनाप यानाःगु तर प्रधानाध्यापकयात छुं नं दुव्र्यवहार मयानाःगु खँ धाःगु दु । बन्दया कारणं पर्सा जिल्लाया जनजीवन पूर्ण रुपं प्रभावित जूगु दु । सदरमुकाम वीरगंजय् बजाः, यातायात, उद्योग आदि दक्वं पूर्ण रुपं बन्द जूगु दु ।
अथेहे बाराया सिमराय् माओवादी समर्थक कार्यकर्तातय्सं बजाः बन्द याकेगु झ्वलय् स्थानीयवासीत नाप जूगु झडपय् स्वम्ह माओवादी कार्यकर्ता व न्याम्ह स्थानीयबासी घाःपाः जूगु दु । जिल्ला प्रहरी बाराया कथं घाःपाः जुपिं माओवादी कार्यकर्तातय्त नारायणी उपक्षेत्रीय अस्पतालय् वासः याकतःगु दुसाः स्थानीयवासीत संजीवनी अस्पतालय् वसाः याकाःच्वंगु दु ।
