एमाले व माओवादीया बैठक निष्कर्षविहीन
सहमति मालेत कार्यदल देयेका ज्या यानाच्वंगु निगू तःधंगु वामपन्थी दलतय् बैठक बिना निष्कर्ष क्वचाःगु दु ।
बिहिवाः सिंहदरवारय् च्वंगु एमालेया संसदीय दलया ज्याकूथी जूगु एमाले व माओवादी दथुइया बैठकय् एमालें सहमतिया निंतिं न्ह्यब्वःगु सहमति प्रस्तावय् माओवादीं असहमति प्वंकूगु खः । एमाले न्ह्यब्वःगु प्यंगू बुँदे सहमति प्रस्तावय् दुथ्याःगु राष्ट्रपति व प्रधानसेनापतिया खँय् प्रधानमन्त्रीं तुरुन्त सम्बोधन यायेमाःगु अडान माओवादीं कायेवं निगू दल दथुइ सहमति जुइमफूगु खः ।
बैठकय् सहमति जुइमफुसां एमाले सचेतक भीम रावलं छुं विषसस माओवादीं असहमति प्वंकूसां थुकीया बारे हानं सहलह यानाः याकनं हे सहमति जुइगु धयादिल । अथेहे माओवादी संसदीय दलया उपनेता नारायणकाजी श्रेष्ठ 'प्रकाशं' निगूलिं दलं थःथःगु अडान कायम याःगुलिं आः दथुइया लँपू पाखें सहमति मालीगु धयादिल ।
निगू दल दथुइ थौं हे सहमति जुसा: माओवादीं थःपिंसं यानाच्वंगु आन्दोलन लित कयाः थौं हे संसद न्हाकेबीगु खँ धाःगु दु ।
