सुरक्षा व्यवस्था सुदृढ यायेत प्रधानमन्त्रीया निर्देशन
प्रधानमन्त्री माधवकुमार नेपालं देशय् सुरक्षा व्यवस्था सुदृढ यायेत सुरक्षा निकायया प्रमुखतय्त निर्देशन बियादीगु दु ।
बिहिवाः प्रधानमन्त्री निवासय बालुवाटारय् नेपाल प्रहरी, सशस्त्र प्रहरी व अनुसन्धान विभागया प्रमुखत नाप नापलाय्गु झ्वलय् वयेकलं जनताया सुरक्षा थौंया प्रमुख आवश्यक्ता जूगुलिं देय्या सुरक्षा व्यवस्था सुदृढ यायेत निर्देशन बियादीगु खः ।
थौं प्रधानमन्त्रीयात नापलायेत प्रहरी महानिरीक्षक रमेश चन्द ठकुरी, सशस्त्र प्रहरीया महानिरीक्षक सनत बस्नेत व अनुसन्धान विभागया धनिसंह कार्की प्रधानमन्त्री निवास थ्यंकादीगु खः ।
अथेहे थौं जूगु मेगू छगू ज्याझ्वलय् प्रधानमन्त्री माधवकुमार नेपालं दलत दथुइ सहमतिया विकल्प मदुगु खँ धयादीगु दु ।
हटौंडाय् राष्ट्रिय खेलकुद प्रतिष्ठानया उल्लेज्या यायेगु झ्वलय् प्रधानमन्त्री नेपालं दलत दथुइ सहमतिया विकल्प मदुगु धासें बन्द व हडताल मयासें सहमति पाखें समाधान मालेमाःगु खँ बः बियादिल । वयेकलं दलतय्सं बन्द व हडताल थंज्याःगु ज्या सदांया निंतिं बन्द यायेमा: धयादिल ।
न्यादँया दुने निर्माण ज्या पूवंकेगु ताः तःगु प्रतिष्ठानया ज्याझ्वलय् प्रधानमन्त्री नेपालं देशय् नेपाली जनताया तःधंगु त्यागया कारणं गणतन्त्रया पलिस्था जूगु जुसां जनतायात परिवर्तनया अनुभूति मजूगु धयादिल ।
