जिल्ला प्रशासन कार्यालय घेराउ
राष्ट्रपतिया असंवैधानिक पलाः लितः कायेमाःगु व नागरिक सर्वोच्चता कायम जुइमाःगु माग यासें राज्यपाखें बेपत्ता योद्धा परिवार समाज व अखिल नेपाल महिला संघ क्रान्तिकारीं देय्न्यंकलं जिल्ला प्रशासन ज्याकु घेरे याःगु दु ।
घेराउलय् ब्वति कापिंसं बेपत्ता नागरिक सार्बजनिक याः बेपत्ता खोजबिन आयोग गठन याः बेपत्ता याःपिंत कारबाही याः लगायतया नारा थ्वयेकूगु खः । येँ जिल्ला प्रशासन ज्याकुसं याःगु धर्नाय् राज्यपाखें बेपत्ता परिवार समाजया नायः एकराज भण्डारी अखिल नेपाल महिला संघ क्रान्तिकारीया निकं जयपुरी घर्ती लगायत द्धलंद्धः मनूतय्गु ब्वति दुगु खः । प्रशासन ज्याकुत स्वनिगलय् छघौ व स्वनिगलंपिने निघौ घेरे यानाःगु राज्यपाखें बेपत्ता योद्धा परिवार समाजया नायः एकराज भण्डारीं जानकारी बियादीगु दु ।
थ्वहे झ्वलय् सुनसरीया जिल्ला प्रशासन ज्याकु ईनरुवा घेरे यानाः धर्ना बिइत वंगु अखिल नेपाल महिला संघ क्रान्तिकारी व समाजया कार्यकर्तातलिसे प्रहरीया ल्वापू नं जूगु दु । ल्वापुया झ्वलय् प्रहरीया झिपु कठि लाकाः कयाः प्रशासन ज्याकु न्ह्यःने उमिंसं कोणसभा नापं याःगु खः ।
