इलय् न्हूगु संविधान दयेकूसा जक शान्ति प्रक्रिया निष्कर्षय् थ्यनी : नेम्वाङ
संविधानसभाया नायः सुभासचन्द्र नेम्वाङं इलय् हे न्हूगु संविधान दयेकूसा जक लोकतान्त्रिक व शान्ति प्रक्रिया निष्कर्षय् थ्यनीगु धयादीगु दु ।
नेपाल नेत्रज्योति संघया येँय् जूगु झिंखुक्वःगु अधिवेशनया उलेज्या ज्याझ्वलय् न्वंवानादिसें वय्कलं आःतक संविधान निर्माण प्रक्रियाय् पंगः जूगु तर छक्वःपतिकंया व्यवस्थापिका संसय् या:गु पंगलं धाःसा संविधान निर्माणया ज्याय् नं समस्या लाइगु धयादीगु दु । फुक्क राजनैतिक दलतय्सं व्यवस्थापिका संसद पालंपाः पंगः थनाच्वंगु धयादिसें सभाध्यक्ष नेम्वाङं थथे यायेबलय् जनताया सः न्यनेमाःगु थाय् पंगः जुइगु धयादीगु दु । वय्कलं दलतदथुइ वर्तमान राजनैतिक समस्या समाधान यायेत दलतदथुइ न्ह्याःगु सहलह सकारात्मक जूगु धयादीगु दु । सभाध्यक्ष नेम्वाङं कन्हय् च्वनीगु व्यवस्थापिकाया बैठक सहमतिलिसे न्ह्यःने न्ह्याइगु विश्वास प्वंकादीगु दु ।
स्वीदँ न्ह्यः पलिस्था याःगु नेत्रज्योति संघं मिखाः ल्वय्पाखें पीडित समुदायया वासः यायेगु व मिखाः ल्वय्पाखें जुइफुगु अन्धकारयात पनेगु निंतिं थीथी ज्या याना वयाच्वनागु खँया जानकारी ब्यूगु दु । थुगु संस्थां झिंनिगू आँखा अस्पताल स्वीन्यागू आँखा उपचार केन्द्र व स्वीगू जिल्लाय् शाखात तयेधुंकूगु दु ।
