माग पूवंसा जक सदन सुचारु

एकिकृत नेकपा (माओवादीं) थःपिनिगु मागया विषयसं न्वंवायेधुंकाः जक सदन सुथांलाक्क न्ह्याकेबीगु निर्णय याःगु दु ।

थौं पार्टी केन्द्रीय ज्याकु बुद्धनगरय् च्वंगु केन्द्रीय सचिवालयया बैठकं म्हिगः जूगु वार्ताया विषयसं एमालें तयार याइगु ड्राफ्टया आधारय् न्ह्यःने न्ह्यायेगु निर्णय जूगु बरिष्ठ नेता मोहन बैद्य किरणं जानकारी बियादीगु खः । बैठकय् कन्हय्निसें न्ह्याइगु एकिकृत नेकपा माओवादीया पोलिटब्यूरो एजेण्डाया विषयसं नं सहलह जूगु प्रवक्ता दिनानाथ शर्मां जानकारी बियादीगु दु । माओवादी एमालेया म्हिगःया बैठकय् राष्ट्रपतिया असंबैधानिक पलाः लितः कायेमाःगु व नागरिक सर्वोच्चता कायम जुइमाःगु उकिया निंतिं सदनय् संकल्प प्रस्तावदथुइ सहलह यायेगु निंतिं लकस मिलय् यायेमाःगु माओवादीया मागया विषयसं सहलह जूगु खः ।