यादव व गच्छदार पक्ष दथुइ ल्वापू
मधेशी जनअधिकार फोरमया संस्थापन पक्षया बुधवाः निसें वीरगंजय् न्ह्याःगु केन्द्रीय कार्यसमितिया बैठक स्थल पिने संस्थापन उपेन्द्र यादव पक्ष व विजयकुमार गच्छदार पक्षया कार्यकर्ता दथुइ ल्वापू जूगु दु ।
निगू पक्ष दथुइ जूगु ल्वापूइ मिसा सभासदत दुर्गा देवी व कलावती पासवान नापं छुं कार्यकर्तात घाःपाः जूगु दु । देवी पर्सां व पासवान बारां फोरमं समानुपातिक प्रणाली पाखें ल्ययाः सभासद जुयादीगु खः ।
वीरगंज श्रीपुरय् च्वंगु सम्झना होटलय् न्हिनय् पार्टी अध्यक्ष उपेन्द्र यादवया अध्यक्षताय् च्वंगु केन्द्रीय कार्यसमितिया बैठक जुयाच्वंगु ईलय् गच्छदार पक्षया सभासद करीमा बेगमया नेतृत्वय् वपिं कार्यकर्तातय्सं होटेल पिनेच्वना: संस्थापन पक्षया विरुद्ध नाराबाजी यायेवं विवाद सुरु जूगु खः ।
लिपाः अध्यक्ष यादव पक्षया कार्यकर्तातय्सं सभासद बेगम व कार्यकर्तात च्वनावःगु मोटरसाईकलय् तोडफोड याःगु खः । प्रहरी व संस्थापन पक्षया इनाप लिपाः सभासद बेगम अनं लिहांवंसां हानं निगू पक्ष दथुइ झडप जूगु खः । कार्यकर्तातय् अगुवाई यानावपिं मिसा सभासदत दुर्गा देवी व कलावति पासवान उगु झडपय् लानाः घाःपाः जूगु खः ।
पिने कार्यकर्तात दथुइ ल्वापू जुयाच्वंसां दुने हाटेलय् धासाः संस्थापन पक्षया बैठक न्ह्यानातुं च्वंगु खः । अन प्रहरीया नं उपस्थिति दुगु खसां प्रहरीया ल्या: म्हो जक जूगुलिं निगू पक्ष दथुइया ल्वापू अप्वयावंगु खः ।
