न्हूगु सहमति आवश्यक : राणा

राष्ट्रिय प्रजातन्त्र पार्टीया अध्यक्ष पशुपतिशमशेर राणां न्हापाया सम्झौताया औचित्य सिधःगु धासें आः राजनीतिक दलतय्सं न्हूगु सहमति यायेमाःगु खँ धयादीगु दु ।

बुधवाः येँय् जूगु छगू साक्षात्कार ज्याझ्वलय् वयेकलं झिंनिगू बुँदे समझदारीया औचित्या सिधेधुंकूगुलिं न्हूगु सहमति यानाः न्ह्याः वनेमाःगु खँ धयादीगु दु । वयेकलं राष्ट्रिय सहमतिया निंतिं माओवादीं हठ त्वतेमाःगु व मेमेगु दलं नं लचकता क्येनेमाः धयादिल ।

अध्यक्ष राणां माओवादी सहितया राष्ट्रिय सरकारय् पक्षय् राप्रपा दुगु धासें दक्वं दल मिलेजुया संविधान निर्माणया ज्याय् लगेजुइमाःगुलि बः बियादिल । सरकारयात ग्वहालि यायेत राप्रपां सरकारय ब्वति कायेगु निर्णय यायेधुंकूगु न्ह्यथंनादिसें मेगु दलतय्सं नं सरकारय् ब्वति कायेमाःगु बीचाः प्वंकादिल ।