प्रधानमन्त्रीं चीन व बेलायतया राजदूतत नापलात
प्रधानमन्त्री माधवकुमार नेपालं बुधवाः चिनिया राजदुत क्वु गो होङ व नेपाःया निंतिं बेलायती कार्यवाहक राजदूत सोफियया विल्लिष्ट किङयात नापलानादीगु दु ।
प्रधानमन्त्रीया ज्याकूथी बुधवाः चिनिया राजदूत नाप जूगु खँल्हाबंलाय् राजदूत होङं नेपा:या शान्ति प्रकृया व तिब्बती शरणार्थीतय्सं नेपालय् यानाच्वंगु आन्दोलन बारे च्यूता प्वंकादीगु खः । अथेहे प्रधानमन्त्री व चिनिया राजदूत दथुइ मन्त्रिमण्डल बिस्तार बारे नं खँल्हाबंला जूगु खः । प्रधानमन्त्री नेपालं सरकार बिस्तार यायेगु बारे दलत दथुइ सहलह जुयाच्वंगु जानकारी बियादिसें मन्त्रिमण्डलं याकनं हे पूर्णता काइगु धयादिल ।
अथेहे बेलायती कार्यवाहक राजदूतं बेलायती प्रधानमन्त्री गोर्डन ब्राउनं प्रधानमन्त्रीयात छ्वयाहःगु भिंतुना पौ लःल्हाःगु खः । नापं बेलायतं बियावयाच्वंगु ग्वहालिया बारे नं खँ जूगु खः ।
