जनताया निक्षेप सुरक्षित जुइमाः

नेपाल विकास बैंक विघटन यायेगु राष्ट्र बैंकया पलाःया कारणं देय्या वित्तीय गतिविधि प्रभावित जूगु दु । मनूतय्सं आः बैंकया शेयरय् लगानी यायेगु जक मखु बैंकय् ध्यबा मुंकेगु ज्याय् तकं निकः बिचाः यायेमाःगु अवस्था थुकिं वःगु दु । गुगुं नं वित्तीय निकाय थःपिंसं याःगु गलत निर्णयया कारणं डुबे जुइगु अस्वाभाविक मखु । व्यापार व्यवसायय् अज्याःगु घटना जुइफु । आः नकतिनि अमेरिकाय् उलिमछि ततःधंगु बैंकत धरासायी जुल । अमेरिका थेंज्याःगु आर्थिक महाशक्तिं नं उकियात पने मफुत । अथे नेपालय् नं जुल ।

तर नेपालय् जूगु थ्व बैंक धरासायी प्रकरणय् सर्वसाधारण मनूतय् निक्षेप समेत चबुइगु खतरा पिहां वःगुलिं उकिं धाःसा सकसितं विचलित याना बिउगु दु । शेयरय् यानातःगु लगानी ला ध्यबा कमे यायेगु ल्याखं जूगु लगानी जुल लगानी डुबे नं जुइफु । तर निक्षेप धाःसा कमे यायेत तःगु ध्यबा मखु । व छगू बचतया ध्यबा खः । उकिं अज्याःगु ध्यबा न्ह्याथे यानाः नं बचे यायेमाःगु कुतः जुइमाः । राष्ट्र बैंकं नं मेगु मखुसां थुकी धाःसा बिचाः यायेमाःगु दु । जनताया सम्पत्ति प्रति राज्य जिम्मेवार जुइगु खःसा थुकी राष्ट्र बैंक चुके जुइ मजिउ । नेपाल विकास बैंक लिपा आः मेमेगु नं बैंकत धरासायी जुइगु लँय् वनाच्वंगु चर्चा जूगु दु । राष्ट्र बैंकं अन हस्तक्षेप यायेबलय् सर्वसाधारण जनताया सम्पत्ति सुरक्षित जुइगुपाखे पलाः ल्ह्वनेमाः । नेपालय् जनतां लगानी यानातःगु बैंक डुबे जूगु थ्व न्हापांखुसी खः । थुकिं सर्वसाधारणं नं अनेक पाठ ला अवश्य हे स्यना काःगु दयेमाः ।

More Stories Like this