बैंकयात अपाङग मैत्री दयेकेत इनाप
येँ (सन्ध्या टाइम्स) / स्वाबलम्बन जीवनपद्दती केन्द्र नेपालं अपाङगतय्गु निंतिं बैंकिंङग क्षेत्रयात अपाङगताया मैत्री दयेकेत नेपाल राष्ट्र बैंकयात इनाप याःगु दु । केन्द्र छगू प्रतिनिधिमण्डलं गभर्नर दिपेन्द्रबहादुर क्षेत्रीयात नाप लानाः थुकथंया इनाप यासे राष्ट्र बैंक नापं मेमेगु बैंक व वित्तीय क्षेत्रयात आपङग मैत्री दयेकेत नं इनाप याःगु खः ।
पूर्ण रुपं शारिरीक अपाङग जूपिं लिसें मेमेपिं अपाङगतय्गु नं पहुँच राष्ट्र बैंक लिसें मेमेगु वित्तीय क्षेत्रय् थ्यनी कथंया पूर्वाधार तयार यायेत नं उगु पुचलं इनाप याःगु खः । अथे हे राष्ट्र बैंकं पितहइगु नोट व म्वः अन्तर्राष्ट्रिय मापदण्ड कथं दृष्टि-विहीनतय् अनुकुल दयेकेत नं इनाप याःगु दुसा अपाङगतय्गु निंतिं विना धितो म्हो व्याजय् ऋण प्रवाह यायेत नं माग याःगु दु ।
उगु इलय् गभर्नर क्षेत्रीं बैंकिंङग क्षेत्र व नेपाली ध्यबा ईयात ल्वयेक अन्तर्राष्ट्रिय मापदण्ड कथं अपाङगता मैत्रीया निंतिं थम्ह फक्व कुतः यायेगु जुइ धासें थौंया इलय् नेपाःया बैंकिंङग क्षेत्रं आधुनिक स्तरया सेवा सुविधा बिया वयाच्वंसां उपिं अपाङग मैत्री जुइ फयाच्वंगु मदु धयादिल ।
विशेषतः राष्ट्र बैंक लिसें छुं छुं बैंक/वित्तीय संस्था व एटीएमया काउण्टर बाहेकं मेमेगु वित्तीय संस्थात अपाङगताया मैत्री जुइ मफुगु खँय् अपाङगतसें धायेगु याना वयाच्वंगु दु ।
