माओवादीं धाःथे याःसा सदन न्ह्याइ
येँ (सन्ध्या टाइम्स) / माओवादी नेतृत्वया सरकारं याःगु निर्णययात आःया सरकारं कार्यान्वयन यात धाःसा सदन न्ह्याके बीगु खँ माओवादीं धाःगु दु । थौं सुथय् च्वंगु माओवादी केन्द्रीय सचिवालयया बैठकं उगु निर्णय याःगु खः ।
'यदि वर्तमान सरकारं न्हापा माओवादी नेतृत्वया सरकारं याःगु निर्णय कार्यान्वयन यात धाःसा सदन सुचारु जुइ' माओवादी प्रवक्ता दिनानाथ शर्मां पत्रकारतय्त कनादिल ।
बैठकय् माओवादीया पूर्व सरकारं यानातःगु निर्णययात कयाः एमालें गज्याःगु प्रस्ताव हइ उकियात स्वयाः जक सदन सुचारु याकेगु वा मयाकेगु धइगु बारे निर्णय यायेगु सहमति जूगु दु ।
'एमालें यदि नागरिक सर्वोच्चताया सम्बन्धय् सकारात्मक धारणा सहित आश्वासन बिल धाःसा सदन न्ह्याके बीगु जुइ' प्रवक्ता शर्मां धयादिल ।
लिसें प्रधानसेनापति कटवालयात कारवाही यायेगु थःपिनि अडान यथावत दनि धासें माओवादीं कटवाल- यात कारवाही यायेगु आश्वासन मवःतले छुं नं कथंया सहमति मजुइगु खँ नं वय्कलं कनादिल । यदि थःपिनि मागयात सरकारं संवोधन मयात धाःसा थप आन्दोलन यायेगु निर्णय नं बैठकं याःगु दु ।
थ्वहे झ्वलय् थौ एमाले व माओवादी नेतृत्व दथुइ निगूगु चरणया वार्ता नं जुइत्यंगु दु । थौंया बैठकय् म्हिगः निगू दल दथुइ जूगु वार्तां क्वः जिउगु सहमतिय्त गय् यानाः कार्यान्वयन यायेगु धइगु बारें एमालें तयार यानातःगु प्रस्ताव पेश याइगु खँ धाःगु दु ।
