ख्वपय् जीटीजेडयात शंका
ख्वप (सन्ध्या टाइम्स) / ऐतिहासिक नगर ख्वपया आपालं ऐतिहासिक सम्पदात जीर्णोद्धार यानाः ख्वप देय्यात न्हूगु रुप बीगु ज्याय् जर्मन विकास परियोजनाजीटीजेडया तःधंगु ल्हाः दु । थ्व परियोजना ताःलायेधुंकाः हे ख्वप नगरपालिकां ख्वप लाय्कुली दुहां वनीपिं पर्यटकतय्के १० डलर शुल्क कायेगु शुरु याःगु खः ।
तःदँ लिपा आः वहे जीटीजेडया मनूत ख्वपय् छगू ज्याझ्वः यायेत वयाच्वंगु दु । तर ख्वप नपां उमित नं १० डलर शुल्क पुलेमाः धकाः कर लगे यायेवं धाःसा जीटीजेडया मनूतय्सं 'जिमिसं दयेका थकागु नगरय् दुहां वनेत जिमिके हे कर कायेगु ला ?' धकाः कचकच याःगु दु । उमिके कर कायेगु लाकि मकायेगु धइगु खँय् आः विवाद जुयाच्वंगु खँ सीदुगु दु । थःपिंसं याना थकागु ज्याया अनुगमन यायेत ख्वपय् वःपिं जीटीजेडया पदाधिकारीतय् हनाय् लाय्कुली थौं छगू सांस्कृतिक ज्याझ्वः नं यायेत्यंगु दु । तर ख्वपया स्थानीय जनतां धाःसा ३० दँ न्ह्यःया खँ लुमंकाः थुगु सांस्कृतिक ज्याझ्वःयात नं शंकाया मिखां स्वयाच्वंगु दु ।
३० दँ न्ह्यः उगु जर्मन परियोजनां ख्वपया ऐतिहासिक सम्पदात जीर्णोद्धार याःबलय् अनया आपालं पुरातात्विक द्यः व महत्वपूर्ण ज्वलंत रहस्यमय ढंगं तंगु खः ।
