निगू फोरमया निथाय् केन्द्रीय बैठक
येँ (सन्ध्या टाइम्स) / सरकारय् वनेगु खँय् विवाद जुयाः निगू कुचादःगु मधेशी जनअधिकार फोरमया निगुलिं पुचःया केन्द्रीय बैठक निगू अलग अलग हे थासय् शुरु जूगु दु । फोरमया अध्यक्ष उपेन्द्र यादवया बैठक वीरगाजया सम्झना होटेल च्वनाच्वंगु दुसा विजय गच्छदारपुचःया केन्द्रीय बैठक येँय् च्वनाच्वंगु दु ।
वीरगाजय् च्वनाच्वंगु उपेन्द्र यादव पक्षीय बैठकं फोरमया संसदीय दलया नेता विजय गच्छदार लगायत न्हय्म्हेसित पार्टीं याःगु निष्कासनयात अनुमोदन यायेत्यंगु खँ जिमि वीरगाज संवाददातां धाःगु दु । लिसें स्वम्ह सभासद्तय्त नं चीकेगु कुतः जुयाच्वंगु दु । फोरमं गच्छदारया लिसें शरतिसंह भण्डारी रामजनम चौधरी जितेन्द्रनारायण देव उपेन्द्र झा रामेश्वर राय यादव व रत्नेश्वर गोइतयात पार्टीं निष्कासन याःगु खःसा नेता गच्छदार भण्डारी व चौधरीयात संविधानसभां चीकेगु पहल याःगु दु ।
बैठकय् ब्वति कायेत बहुमत दुजःत वीरगाज थ्यंकः वयाच्वंगु दावी यादव पक्षं याःगु दु । उखे येँय् च्वनाच्वंगु गच्छदार पुचःया बैठकं राष्ट्रिय भेला सःतेगु निर्णय यायेत्यंगु दु तर निर्वाचन आयोगं मान्यता मबीकं अध्यक्ष उपेन्द्र यादवयात मचीकेगु खँ गच्छदार पुचलं धाःगु दु ।
