सरकारया न्हापांगु प्राथमिकता लडाकू समायोजन : प्रधानमन्त्री
प्रधानमन्त्री माधवकुमार नेपालं माओवादी लडाकूतय् समायोजन यायेगु ज्या सरकारया न्हपांगु प्राथमिकता जूगु खँ धयादीगु दु ।
प्रेस चौतारीं ज्ञापन पौ लःल्हायेगु झ्वलय् प्रधानमन्त्री नेपालं माओवादी लडाकूतय् समायोजन सरकारया न्हापांगु प्राथमिकता जूगु खँ धयादीगु खः । बुधवाः थःगु हे ज्याकूथी पत्राकारत नाप वयेकलं संविधान निर्माण, शान्ति प्रकृया व निर्वाचन मार्फत न्हूगु सरकार गठन तकया अभिभारा पूवंकेत थः प्रतिवद्ध दुगु धयादिल । लोकतान्त्रिक आन्दोलनय् नेपाःया प्रेसं म्हितुगु भूमिकाया प्रसंशा यासें वयेकलं सरकारया नीति व ज्याझ्व कार्यान्वयनय् ग्वहालि यायेत संचारकर्मीतय्त इनाप यानादिल ।
प्रेस चौतारीया पदाधीकारीतय्सं संचारकर्मी व संचार गृहय् जुइगु आक्रमण बन्द जुइमाःगु, दोषीयात कारवाही यायेमाःगु, पूर्वाग्रही ढंगं पत्रकारयात तयातःगु मुद्दा खारेज यायेमाःगु लगायत माग यासें प्रधानमन्त्रीयात ज्ञापन पौ लःल्हाःगु खः ।
अथेहे ज्ञापन पौलय् लोक कल्याणकारी विज्ञापनयात दोब्बर यायेमाःगु, श्रमजीवी पत्रकार ऐन प्रभावकारी रुपं लागु यायेमाःगु व पत्रकारतय् हत्याय् संलगनयात कडा कारवाही यानाः सीपिंनि छेँजः पिंत राहत बीमाःगु माग नं याःगु दु ।
