भारतीय एजेन्टं फोरम विभाजन याःगु : यादव
गिरिजा व माधव नेपाल भारतीय एजेन्ट
मधेशी जनअधिकार फोरमया अध्यक्ष उपेन्द्र यादवं भारतीय एजेन्टं फोरम विभाजन याःगु दावी यानादीगु दु । वयेकलं कांग्रेस सभापति गिरिजाप्रसाद कोइराला व प्रधानमन्त्री माधव नेपालयात भारतीय एजेन्ट जूगु द्वपं नं बियादीगु दु ।
वीरगन्जय् फोरमया केन्द्रीय समितिया बैठकय न्ह्याये स्वयां न्ह्यः पत्राकारत नाप खँल्हासें वयेकलं फोरमयात विभाजन यायेगुलि भारतीय एजेन्टया ल्हाः दुगु धासें अध्यक्ष यादवं भारतीय एजेन्ट गिरिजा व माधव जूगु धयादिल । वयेकलं गिरिजा व माधव नेपालं हे थःगु पार्टी विभाजन याःगु दावी यानादिल ।
वयेकलं विजयकुमार गच्छदारं कारवाहीलय् लापिं दुजःतय् हस्ताक्षर यंकाः थःगु पक्ष आधिकारिक जूगु दावी याःगु धासें उकिया छुं हे मान्यता मदइगु धयादिल । वयहेकलं थन केन्द्रीय बैठकय् आः हे नीन्याम्ह स्वयां अप्व केन्द्रीय समितिया दुजःत उपस्थित जुइधुंकूगुलिं नं गच्छदार पक्षया छुं औचित्य मदुगु धयादिल ।
थौं च्वनीगु बैठकं फोरमया न्हूगु रणनीति, गच्दारनापं न्ह्यम्ह दुजःतय्त याःगु कारवाही अनुमोदन याइगु व सरकार विरुद्धया आन्दोलनया ज्याझ्वः क्वछीइगु जूगु दु । बैठक वीरगन्जया होटल सम्झनाय् जुयाच्वंगु दु ।
