समानुपातिया ल्याः म्हो याःगु प्रति जनजातितय् विरोध

संविधानसभा निर्वाचनय् समानुपातिक प्रतिनिधिया ल्याः म्हो यायेगु सहमति प्रति नेपाल आदिवासी जनजाति महासंघ लगायत थीथी आदिवासी जनजाति संघ संस्थातय्सं विरोध याःगु दु । महासंघ लगायत थीथी संघ संस्थां विरोध कथं प्यंगु दलयात ज्ञापनपत्र लः ल्हाःगु दु । सोमवाः छगु मोटरसाइकल र्‍याली पिथना आदीवासी जनजाति महासंघया नेतृत्वय् एमाओवादी, कांग्रेस, एमाले व संयुक्त लोकतान्त्रिक मधेसी मोर्चाया ज्याकुथीइ वना ज्ञापन पत्र लः ल्हायेगु ज्या याःगु खः ।

ज्ञापनपत्र लः ल्हायेगु झ्वलय् महासंघया नायः राजकुमार लेखीं समानुपातिक प्रतिनिधित्व म्ह यानाः संविधानसभाया निर्वाचन यायेगु कुत यात धाःसाः दक्वं दलत पराजय जुइगु खँ धयादिल । नापं आदिवासी जनजातिया समानुपातिक सिट म्हो यायेगु निर्णययात आदिवासी जनजाति महासंघ व आदिवासी जनजाति संघ संस्थातय्सं घोर विरोध यायेगु खँ धयादिल ।

ज्ञापनपत्र लःल्हायेत किरात याक्थुङ चुम्लुङ, किराँत राई यायोक्खा, तमू ह्‍युल छोँज धी, नेवाः देय् दबू, शेर्पा राष्ट्रिय परिषद मञ्च, लिम्बूवान राज्य परिषद, संघीय लोकतान्त्रिक राष्ट्रिय मञ्च, ताम्सालिङ राष्ट्रिय दलया ब्वति दुगू खः ।