देय् न्यंकं चक्काजाम
माओवादी निकट अखिल नेपाल किसान संघ २००७ सं राष्ट्रपतिया असंबैधानिक कदम भिंकेमाःगु व नागरिक सर्बोच्चता कायम यायेत माग यासें थौं देय्न्यकलं चक्काजाम याःगु दु । संघं स्वनिगलय् सुथय् झिताः इलंनिसें छघौतक व स्वनिगलंपिने झिताः इलंनिसें निघौतक चक्काजाम याःगु खः । नागरिक सर्बोच्चता स्थापनाया निितं एकिकृत नेकपा माओवादीं घोषणा याःगु ज्याभुवःकथं थीथी भातृ तथा भगीनी संगठनतय्सं विरोधया ज्याभुवः यानाः वयाच्वंगु दु । चक्काजाम ज्याभुवः क्वचायेका याःगु कोणसभाय् न्वंवासें अखिल नेपाल किसान संघ २००७ तथा अखिल नेपाल सुकुम्बासी संघर्ष समितिया केन्द्रीय नायः चित्रबहादुर श्रेष्ठं क्रान्तिकारी भूमिसुधार लागू यायेत न्ह्यज्यानाच्वंगु अवस्थाय् भारतीय अतिक्रमणं यानाः नेपाली ऊर्बर भूमि भारतय् मिसय् यानाः नेपाःमििपंत भूमिहिन व सुकुम्बासी दयेकूगु खँय् च्यूताः प्वंकूगु दु ।
'नेपाली किसानतय्गु हकहितया क्रान्तिकारी भूमिसुधार माःगु दु ।' सभासद् समेत जुयाच्वनादीम्ह श्रेष्ठं धयादी - 'भूमिहिन किसानत व सुकुम्बासीतय्त यथोचित ब्यवस्था सरकारं यायेमाः ।' विदेशी महाशक्तितय्गु इशाराय् दयेकूगु सरकारं राष्ट्रियताया नितिं छु नं कुतः मयाःगुलिं नेपाली किसानतय्सं नेपाल भारतया सीमानाय् दुगु भूमियात थःम्हं हे रक्षा यायेमाःगु खँय् बह बियादीगु दु । वय्कलं भूमिया सवाललिसे राष्ट्रियताया सवालय् नेपालया फुक्क किसान व सुकुम्बासीत छधी जुयाः प्रतिकारय् कुहाँवयेमाःगु बिचाः नं तयादीगु खः ।
