मधेशवादी दलतय्सं हिन्दी भाय्यात मान्यता बीत माग
मधेशवादी दलतय्सं न्हूगु संविधानय् नेपाली भाय् नापं हिन्दी भाय्यात नं सरकारी ज्याखँया भाय्या कथं मान्यता बीमाःगु अडान काःगु दु ।
संविधानसभाया सांस्कृतिक सम्बन्ध व सामाजिक ऐक्यबद्धताया आधारय् निर्माण समितिया बैठकय् मधेशवादी दलत मधेशी जनअधिकार फोरम, तराई-मधेश लोकतान्त्रिक पार्टी व सद्भावना पार्टीं कन्द्रीय तहलय् हिन्दीयात नं मान्यता बीमाःगु माग यायेवं बैठकय् सभासदत दथुइ बिवाद जूगु खः । विवादया कारणं सतिमतिया मस्यौदा तथा अवधारणा पौ तयार यायेवलय् हिन्दी भाय् सम्बन्धी व्यवस्था बारे फरक मत तयेगु वा मतदान यायेगु धइगु खँय् तकं निर्णय जुइमफुत ।
भारतय् हिन्दी भाय् न्ववाइ धायेवं नेपालय् थुकीयात विरोध यायेमाःगु छुं आवश्यकता मदुगु धासें मधेशवादी दलया सभासदतय्सं अंग्रेजी न्ववाइपिं दक्वं बेलायती मजुइगु तर्क तःगु खः । तर माओवादी, कांग्रेस, एमाले लगायत दलया सभासदतय्सं धासाः भाय् सम्बन्धी आयोगं ब्यूगु प्रतिवेदनया आधारय् न्ह्याः वनेमाःगुलिं आ: हे थुकी बारे अडान कायेगुया छुं अर्थ मदुगु खँ धा:गु खः ।
विवाद अप्वयेवं समितिया सभापति नवोदिता चौधरीं दक्व भाय्यात उचित सम्मान यायेमाःगु धासें सहमति मार्फत समाधान मालेमाःगु धयादिल । भाय्या विषयस फरक मत च्वयेगु वा मतदान यायेगु बारे निर्णय यायेमफेवं बैठक बिहिवाः तकया निंतिं स्थगित याःगु दु ।
