महरां म्हुतु चायेकल
एकीकृत नेकपा माओवादी सचिवालय दुजः कृष्णबहादुर महरां न्हूगु सरकार दयेकेगु क्रमलिसे त्वाःथलेगु क्रम नं न्ह्याःगु धयादीगु दु । नेपाल पत्रकार महासंघ दाङं थौं सुथय् याःगु पत्रकार सम्मेलनय् न्वंवानादिसें महरां पुलांगु सहमितं सहकार्य जुइमफइगु धयादीगु दु ।
वय्कलं हिलावंगु परिस्थितिइ राष्ट्रपतिया असंबैधानिक कदम िभंकाः न्हूगु शिरापाखें राजनीतिक सहमति कायम यानाः न्हूगु संविधान निर्माण प्रकृया न्ह्याकेमाःगु धयादीगु दु । सैनिक सर्बोच्च्ाताय् दयेकूगु बर्तमान सरकारं नागरिक सर्वोच्चता बहाली यायेमफइगु धयादिसें नेता महरां राष्ट्रपतिया कदम मिभंकूतले माओवादी प्रतिपक्षय् च्वनाच्वनेगु धयादीगु दु । देशयात तःधंगु दुर्घटनापाखें बचय् यायेत माओवादी नायः प्रचण्डं प्रधानमन्त्री पदपाखें राजीनामा ब्यूगु धयादिसें महरां न्हापाया सरकारं याःगु निर्णय अःखः यायेगु आःया सरकारया ज्या देशयात दुर्घटनाय् यंकीगु संकेत जूगु धयादीगु दु । एमालेया नेतृत्वया सरकारं सेना समायोजन मयानाः मुलुकय् दुर्घटनाय् लाकाः माओबादीयात हाकनं युद्धय् लिछ्वयेगु षडयन्त्रय् वंगु धासें नेता महरां माओबादीयात युद्धय् वनेगु बाध्यताया स्थिति सृजना याःसा माओवादी उकिया सामना यायेत तयार दुगु धयादीगु दु ।
कम्युनिष्ट सरकार असफल जूगु क्यनेत कांग्रेसं विदेशीया इशाराय् एमालेयात सरकारया नेतृत्व याके बियाः थःम्ह रजाइँ यायेत स्वःगु महरां टिप्पणी यानादीगु दु । सरकार साचालन यायेगु ताःचाः विदेशीया ल्हातय् दुगु चर्चा यासें नेता महरां सत्ताया ताःचाः नेपालीया ल्हातय् मवतले सरकार क्वःथलेगु व दयेकेगु ज्यां निरन्तरता कयाच्वनीगु धयादीगु दु ।
