कलाकार तथा कर्मचारी संघया अधिवेशन

नेपाल प्रज्ञा प्रतिष्ठानया लोकतान्त्रिक कलाकार तथा कर्मचारी संघया स्वक्वःगु अधिवेशन माघ २६ गते प्रज्ञाभवनय् झःझः धाय्क क्वचाल । नेपाली कांग्रेसया केन्द्रीय दुजः अर्जुन नरसिंह केसीया मूपाहांसुइ न्ह्याःगु उगु अधिवेशनं सुरेन्द्रकाजी सिन्दुराकारया अध्यक्षताय् झिम्ह दुजः दुगु छगू न्हूगु ज्यासना पुचः स्वंगु दु । उगु ज्यासना पुचःया न्वकुलय् विश्वास घिमेरे व ऋषिराम गिरि, महासचिवय् बुद्धिध्वज तिमिल्सिना, सचिवय् हरि पाठक, कोषाध्यक्षय् उदय देव घिमेरे व सदस्यय् सानु पुजारी, अशोक चौरसिया ,सीता कार्की, अमृता तिवारीपिं निर्वाचित जूगु दु । उगु अधिवेशनय् कलाकार व कर्मचारीपिन्सं थःथःगु थासं राष्ट्रया नितिं योगदान जूवनिकथंया बांलागु ज्या याना वनेमाःगु धारणा मूपाहां लगायत वक्तापिन्सं नुगः खँ प्वंकूगु खः ।